मंगळवेढा (सोलापूर) : शहराबाहेर असणारा कोरोना अखेर शहरात येऊन धडकला. त्यामुळे शहरातील नागरिकांची खळबळ उडाली. मात्र पालिकेची उपाययोजना करणाऱ्या कर्मचाऱ्यांचा मुख्याधिकाऱ्याविना लढा सुरू आहे. 

हेही वाचा : बियाणे न उगवल्याच्या प्रकरणी बियाणे विक्रेता संघटनेने काय भूमिका घेतली? ते वाचा 

काल प्रशासनाने जाहीर केलेल्या आकडेवारीमध्ये शहरातील एक रुग्ण पूर्ण पॉझिटिव्ह असल्याचे सांगितल्यामुळे प्रशासनाने रात्रीपासून यासाठीच्या उपाययोजना करण्यासाठी पावले उचलण्यास सुरवात केली. सध्या या पॉझिटिव्ह रुग्णाच्या संपर्कातील नऊ जणांना संस्थात्मक विलगीकरण करण्यात आले आहे. खबरदारी म्हणून शहरातील दुकाने- व्यवसाय बंद करण्यात आले आहेत. कृषी उत्पन्न बाजार समितीने आज होणारे सौदे देखील बंद केले आहेत. पालिकेच्या वतीने या प्रभागामध्ये फवारणीची सुरवात करण्यात आली आहे. 

हेही वाचा : माळशिरसच्या "या' भागातही केली कोरोनाने एंट्री 

गेल्या काही दिवसांपासून शहरामधील वातावरण शिथील केल्यामुळे नागरिकांनी सोशल डिस्टन्सिंगचे पालन करण्यास टाळाटाळ केली. त्यामुळे शहरामध्ये याचा प्रादुर्भाव होण्याची शक्‍यता नाकारता येत नसल्याची चर्चा सुरू असतानाच, अखेर शहरात पॉझिटिव्ह रुग्ण सापडला आहे. रिक्त पदे आणि अतिरिक्त कामकाज यामुळे पोलिसांवरील कामाचा ताण वाढत असताना, आता नव्याने त्यामुळे प्रतिबंधक उपाययोजनेची सर्वस्वी जबाबदारी पोलिसांवर येऊन पडली आहे. आतापर्यंत महसूल, पोलिस, नगरपालिका प्रशासन यांनी समन्वयाने काम केल्यामुळे शहरातील वातावरण सुरळीत होते. मुख्याधिकारी पल्लवी पाटील यांची नुकतेच महाबळेश्वर येथे बदली झाली. त्यांच्या जागी नवीन अधिकाऱ्याची नियुक्ती केली नसल्यामुळे सध्या नगरपालिकेच्या प्रशासनाचा गाडा कारभाऱ्याविना सुरू आहे. अशा परिस्थितीत सध्या शहरातील लोकप्रतिनिधी व नगरपालिकेच्या कर्मचाऱ्यांनी समन्वयातून काम करून सोशल डिस्टन्सिंगचे पालन करण्यासाठी नागरिकांना परावृत्त करणे आवश्‍यक असताना, शासनाने कायमस्वरूपी मुख्याधिकाऱ्याची तातडीने नियुक्ती करण्याची मागणी शहरातील नागरिकांतून होत आहे. 

संपादन : श्रीनिवास दुध्याल