मंगळवेढा (सोलापूर) ः अधिकाऱ्याच्या निष्काळजीपणामुळे मंगळवेढा आगारातील एस.टी. वाहकाचा बळी गेला असून आणखीन किती कर्मचाऱ्यांचा बळी घेणार असा सवाल मंगळवेढा आगारातील कर्मचाऱ्यांनी व्यक्त केला आहे. यापूर्वी अशीच घटना 2015 साली घडलेली होती. दरम्यान गावडेचा मृतदेह ताब्यात घेण्यास कामगार संघटनानी नकार दिला.
मुंबईत बेस्टच्या मदतीला गेलेल्या सोलापूर विभागातील मंगळवेढा आगराचे वाहक भगवान गावडे (वय 48) यांचा वेळेवर उपचार न मिळाल्याने कुर्ला येथील एका हॉटेलमध्ये मृत्यू झाला. मूळव्याधीचा त्रास असलेल्या गावडे यांची गेल्या तीन दिवसांपासून प्रकृती खालावली होती. एसटीचे वाहतूक नियंत्रक एन. के. जाधव आणि संबंधित अधिकाऱ्यांकडे उपचार मिळावा म्हणून तक्रार केली. निकृष्ट दर्जाचा आहार, काम संपल्यानंतर 4-4 तास होणारी धावपळ आणि मुंबईतील वातावरण कर्मचाऱ्यांना सुट न होणे यामुळे हे कर्मचारी आणखीनच अडचणीत सापडले आहेत.
या प्रकाराची दखल न घेतल्याने भगवान गावडे यांना उपचाराविनाच जीव गमवावा लागला आहे. वाहक भगवान गावडे या हे आजारी असून त्यांना कामावर पाठवू नये अशी विनंती त्यांच्या पत्नीने आगार व्यवस्थापक यांच्याकडे केली होती. अशा परिस्थितीत त्याला कामावर पाठवण्यात आले. कामावर गेल्यानंतर तिथल्या अधिकाऱ्यांनी त्यांच्या प्रकृतीच्या तक्रारीकडे दुर्लक्ष केल्यामुळे त्या कर्मचाऱ्याचा हकनाक बळी गेला आहे. अशीच घटना मंगळवेढा आगारांमध्ये चिपळूण येथे ज्यादा गणपती वाहतुकीसाठी गेलेल्या अनिल कांबळे या वाहकाच्या बाबतीत 2015 साली घडली. या प्रकरणानंतर देखील अधिकाऱ्यांनी शहाणपण न घेता आपला हेकेखोरपणा चालू ठेवल्यामुळे मंगळवेढ्यातील दुसऱ्या कर्मचाऱ्यांचा बळी गेला. मयत गावडे यांच्या मृत्यूने तालुक्‍यातील ब्रम्हपुरी गावावर शोककळा पसरली.
अधिक वयाच्या कर्मचाऱ्यांना पाठवणे चुकीचे
55 वर्षाच्या वर कर्मचाऱ्याला बेस्ट सेवेत न पाठवण्याच्या परिपत्रकाकडे दुर्लक्ष करत कर्मचाऱ्यांची पिळवणूक गेली जात आहे. कोरोना संकटात अडचणीत आलेल्या कर्मचाऱ्याला निलंबनाची भिती दाखवून कामावर पाठवले जात आहे. डयुटी लावण्यासाठी तीन-तीन अधिकारी असताना नियोजनाचा अभाव आहे. यात अधिकाऱ्यांचा निष्काळजीपणा जबाबदार आहे.
- नवनाथ जाधव, डेपो सेक्रेटरी,कामगार संघटना
संपादनः प्रकाश सनपूरकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.