अकलूज(सोलापूर): दूध पावडरच्या किमती घसरण्याच्या कारणासोबत राज्यातील दूध संघाकडून उपपदार्थाची निर्मिती व बाजारपेठेतील स्थान भक्कम नसल्याने दूध दराचा प्रश्‍न निर्माण झाला आहे. परराज्यातील दूध संघांनी नेमके याच बाबतीत बाजारपेठेत वर्चस्व निर्माण केले आहे. त्यामूळे दूध संघांना उपपदार्थ निर्मितीचे अर्थकारण उभे करणे ही गरज निर्माण झाली आहे. 

हेही वाचाः सोलापूरच्या भैय्या चौकातील रेल्वे उड्डाण पुलाचा मार्ग मोकळा 

महाराष्ट्रातील खासगी दुध संघ मोठ्या प्रमाणावर दुध पावडर तयार करतात. लॉकडाउन सुरू होण्यापूर्वी दुधपावडरच्या किमती 280 ते 300 रूपये होता. आता तो 150 ते 200 रूपयांपर्यंत खाली आल्या आहेत. त्यामुळे दूध पावडर बनवुन शेतकऱ्यांना दर देणे परवडत नाही. 

हेही वाचाः ग्रामीण भागामध्ये ऑनलाइन शिक्षणाच्या भडीमाराने विद्यार्थ्यासह पालक त्रस्त, कुठे? ते वाचा 

शासनाने दूध उत्पादकांना आधार द्यायचे काम केले. पण ती परिपुर्ण मदत नव्हती. महाराष्ट्रात दुधाचे उत्पादन मोठ्या प्रमाणावर होते. परंतु दूध संघ पॅकिंग आणि उपपदार्थ निर्मितीमध्ये कमी पडतात. जेवढ्या प्रमाणात पुढील प्रक्रियेतून निर्माण होणारे उपपदार्थ बाजारात येऊन त्यावर अर्थकारण भक्कम होऊ शकते. त्या आधारे दूध उत्पादकाच्या दुधाला चांगला भाव मिळू शकतो. परराज्यातील दूध संघांचा पॅकिंग आणि उपपदार्थ विक्रीवर भर आहे. परराज्यांतुन आलेल्या या संघांनी महाराष्ट्रातील दूध पॅकिंग व उपपदार्थांच्या बाजारपेठा काबीज केल्या आहेत. 

सर्वाच्या विचाराने तोडगा निघावा 
शासनाने वेळीच हस्तक्षेप करून दुध उत्पादकांना न्याय देण्याचे काम करावे. दूध दर सर्वांच्या विचारातून तोडगा काढला जावा. 
- धैर्यशील मोहिते-पाटील, अध्यक्ष शिवामृत दूध संघ 
 

संपादनः प्रकाश सनपूरकर