सोलापूर : शहरातील बाजारपेठांत 10 ते 12 तास उन्हातान्हात फिरून पैसे गोळा करून बॅंकांत जमा करणारा, बॅंका व ग्राहकांत दुवा म्हणून काम करणारा व मिळणाऱ्या कमिशनवर उदरनिर्वाह करणारे पिग्मी एजंट लॉकडाउनने बेरोजगार झाले होते. आता लॉकडाउननंतर दिवसभर भटकंती करून अपेक्षित वसुली होत नसल्याने बेजार झाले आहेत. 

हेही वाचा : कोरोनाविरुद्ध लढण्यासाठी द्या "या' व्यवसायाला परवानगी 

लॉकडाउन शिथिल झाल्यापासून बाजारपेठांतील दुकाने सुरू झाली आहेत. मात्र, एकदिवसाआड दुकाने सुरू होत असल्याने, सकाळी नऊ ते सायंकाळी पाचपर्यंत दुकाने सुरू करण्याची परवानगी मिळाल्याने व ग्राहकांचा अपेक्षित प्रतिसाद नसल्याने बाजारपेठांत म्हणावा तसा पैसा अजूनही फिरत नाही. लॉकडाउनमध्ये महत्त्वाचे सण, लग्नसराई असा ऐन सीझन काळ गेल्याने लॉकडाउननंतर दोन-अडीच महिन्यांनी दुकाने सुरू होऊनही अनेक व्यापारी, दुकानदार ग्राहकांची वाट पाहात आहेत. त्यात कामगारांचा पगार, नवीन गुंतवणूक करण्यासाठी व्यापारी व दुकानदारांना आर्थिक मदतीची गरज आहे. त्यामुळे पिग्मी भरून बचत करण्याएवढा व्यवसाय होईल तेव्हा पिग्मी भरू, असे व्यावसायिक व दुकानदारांकडून आलेल्या पिग्मी एजंटांना सांगितले जात आहे. आर्थिक चक्र लगेच सुरळीत होण्याची चिन्हे दिसत नसल्याने आणखी किती महिने उपासमार घडणार, याची चिंता पिग्मी एजंटांना लागली आहे. 

हेही वाचा : लॉकडाउननंतर दुकाने सुरू, तरी "हे' का आहेत बेरोजगार? 

बॅंकेसंबंधी कामे करूनही आम्हाला कर्मचारी म्हणून मान्यता नाही. ईपीएफ, ईएसआय, बोनस, हक्करजा अशा कोणत्याही सामाजिक सुरक्षा नाहीत. थंडी, ऊन, वारा व पाऊस झेलत ज्या दिवशी 10-12 तास, 30 ते 35 किलोमीटर फिरून रक्कम वसुली केली, त्याच दिवशी अडीच ते तीन टक्के कमिशन मिळते. मात्र, लॉकडाउनने वसुली बंद झाली. आता लॉकडाउननंतर दुकाने सुरू झाली तरी दोन-अडीच हजारांचीच वसुली होत आहे. आणखी सहा महिने अशीच परिस्थिती राहण्याची चिन्हे आहेत. आम्हाला पर्यायी दुसरा व्यवसाय, उद्योग नसल्याने सरकारने निदान पाच हजार रुपयांची आर्थिक मदत करावी. 
- किशोर बुलबुले, 
पिग्मी एजंट