पंढरपूर (जि. सोलापूर) : खर्डी (ता. पंढरपूर) येथील सिताराम महाराज साखर कारखान्याच्या विरोधात आता उस्मानाबाद जिल्ह्यातील शेतकऱ्यांनीही उपोषणाचे हत्यार उपसले आहे. परांडा तालुक्‍यातील अनेक शेतकऱ्यांनी आज येथील तहसील कार्यालायासमोर थकीत एफआरपी मिळावी या मागणीसाठी बेमुदत उपोषण सुरु केले आहे. 

हेही वाचा - #solapur गड्डा यात्रेत स्वच्छता अभियानाला प्रबोधनाची जोड: 'सकाळ'चा उपक्रम 

उस्मानाबाद जिल्ह्यातील परांडा, भूम या भागातील अनेक शेतकऱ्यांनी गत हंगामात (2018-19) भाजप नेते कल्याणराव काळे यांच्याशी संबंधित असलेल्या सिताराम महाराज साखर कारखान्याला ऊस पुरवठा केला होता. कारखान्याने पंधरा दिवसात एफआरपीची रक्कम देतो, असे सांगून या भागातील सुमारे दोन हजार टनाहून अधिक ऊस गाळपासाठी आणला आहे. परंतु कारखान्याने या भागातील शेतकऱ्यांना अद्याप एक दमडी दिला नाही. 

हेही वाचा - सोलापूर जिल्ह्यात माजी सैनिकाचा खून 

थकीत एफआरपीची रक्कम मिळावी या मागणीसाठी पंढरपूर, मोहोळ, माळशिरस या भागातील शेतकऱ्यांनी प्रहार संघटनेच्या नेतृत्वाखाली सोमवारी तहसील कार्यालयासमोर बोंबाबोंब आंदोलन केले होते. त्यानंतर मंगळवार (ता. 28) पासून भूम, परांडा या भागातील शेतकऱ्यांनीही थकीत रक्कम मिळावी या मागणीसाठी तहसील कार्यालयासमोरच बेमुदत उपोषण सुरु केले आहे. 

हेही वाचा - बापरे... आगीत जळाली लग्नासाठी जमवलेली रोकड 

दरम्यान, आज दुपारी बळीराजा शेतकरी संघटनेचे पश्‍चिम महाराष्ट्र अध्यक्ष माऊली हळणवर यांनी आंदोलक शेतकऱ्यांची भेट घेवून उपोषणाला पाठिंबा दिला. कारखान्याकडील एफआरपीची थकीत रक्कम मिळवून देण्यासाठी बळीराजा शेतकरी संघटना कायम शेतकऱ्यांसोबत आहे, असे आश्वासन श्री. हळणवर यांनी यावेळी शेतकऱ्यांना दिले. मागील महिन्यात महसूल प्रशासनाने कारखान्याची 10 कोटी 57 लाख रुपयांची साखर विक्री केली आहे. परंतु न्यायालयाने पुणे येथील युनियन बॅंकेला पैसे देण्याचे आदेश दिले आहेत. त्यामुळे ऊस पुरवठा केलेल्या शेतकऱ्यांवर पैसे मिळवण्यासाठी पुन्हा आंदोलन करण्याची वेळ आली आहे.