सोलापूर : उजनी धरणात आता 38.21 टीएमसी (71.31 टक्‍के) पाणीसाठा शिल्लक राहिला आहे. उजनी धरणातून शहरासाठी वर्षातून चारवेळा 20 टीएमसी पाणी नदीद्वारे सोडले जाते. तर धरणावरून केलेल्या जलवाहिनीद्वारे 0.93 टीएमसी पाणी सोडण्यात येते. तरीही शहरातील नागरिकांना नियमित पाणी मिळू शकलेले नाही. आता धरणातून नदीद्वारे औज बंधाऱ्यात पाणी सोडण्यात आले असून 7 एप्रिलला पुन्हा पाच टीएमसी पाणी सोडले जाणार आहे. कालवा सल्लागार समितीच्या बैठकीत त्याला मंजुरी मिळाली आहे. 

हेही नक्‍की वाचा : अरेच्चा ! खासदार डॉ. महास्वामींनी दिला नाही जातीचा मूळ दाखला 

शहरातील नागरिकांच्या पाण्याचा प्रश्‍न सुटावा, त्यांना नियमित पाणी मिळावे या हेतूने जलसंपदा विभागासमवेत झालेल्या करारानुसार महापालिकेने स्वत:चे पाण्याचे स्रोत निर्माण करणे आवश्‍यक आहे. मात्र, मागील कित्येक वर्षांपासून महापालिकेने स्वत:चा एकही स्रोत निर्माण केलेला नाही. दुसरीकडे उजनी धरणावरील जलवाहिनीला लागलेली गळतीही अद्याप थांबलेली नाही. शहरातील बहुतांश भागातील जलवाहिनीही जुनाट झाल्याने अंतर्गत पाइप फुटू लागले आहेत. त्यामुळे नागरिकांना अस्वच्छ पाणी प्यावे लागत असून त्यातून आजारांना निमंत्रण मिळत आहे. उजनी धरणातील पाणीसाठा आता झपाट्याने कमी होऊ लागल्याने महापालिका प्रशासनाने ठोस नियोजन करण्याची गरज आहे, अशी अपेक्षा पाटबंधारे विभागाने व्यक्‍त केली. 

हेही नक्‍की वाचा : राज्यातील 40 हजार शिक्षकांना वाटाण्याच्या अक्षता 

मार्च-एप्रिलमध्ये पुन्हा कालवा सल्लागार समितीची बैठक 
मागील कालवा सल्लागार समितीच्या बैठकीत 7 एप्रिलला सोलापूर शहरासाठी पाणी सोडण्याचा निर्णय झाला आहे. उन्हाळा सुरू होताना शहरातील नागरिकांची पाणीटंचाई दूर व्हावी हा त्यामागचा उद्देश आहे. त्यावेळी उजनी धरणातून पाच टीएमसी पाणी सोडले जाईल. तत्पूर्वी, मार्च-एप्रिलमधील कालवा सल्लागार समितीच्या बैठकीत नियोजन ठरेल. 
- धीरज साळे, अधीक्षक अभियंता, पाटबंधारे 

हेही नक्‍की वाचा : खुषखबर ! पाठदुखीचा त्रास होणार कमी 

ठळक बाबी... 

• सद्यःस्थितीत उजनी धरणात आहे 71.31 टक्‍के पाणीसाठा 
• 7 एप्रिलला नदीद्वारे सोडले जाणार औज बंधाऱ्यात पाच टीएमसी पाणी 
• करारानुसार महापालिकेने स्वत:चे पाण्याचे स्रोत निर्माण केलेच नाहीत 
• औज बंधाऱ्यावर शहराच्या पाणीपुरवठ्याची भिस्त : उन्हाळ्यापूर्वी ठोस नियोजनाची गरज 
• एप्रिलच्या पहिल्या आठवड्यात कालवा सल्लागार समितीची बैठक : उजनीतील पाण्याचे ठरणार नियोजन