महूद (सोलापूर) : सांगोला तालुक्‍यातील महूद परिसरात शनिवारी बिबट्या दिसल्याच्या अफवेने नागरिकांमध्ये घबराट निर्माण झाली. मात्र पायाचे ठसे व वर्णन पाहता नागरिकांनी पाहिलेला प्राणी तरस असल्याने लोकांनी घाबरू नये, असे आवाहन वनविभागाच्या वतीने करण्यात आले आहे.

सोलापूरच्या बातम्यांसाठी येथे क्लिक करा 
 
महूदच्या उत्तरेला असणाऱ्या ठोंबरेवाडी, कोळेकरवस्ती, येडगेवाडी, कारंडेवाडी (महिम) या भागात शनिवारी सकाळी येथील नागरिकांनी बिबट्या पाहिल्याची चर्चा सर्वत्र पसरली. याबाबत माहिती मिळताच वन विभागाचे अधिकारी धनंजय देवकर व त्यांचे सहकारी घटनास्थळी पोहोचले. ठोंबरेवाडी, कोळेकरवस्ती येथील स्थानिकांशी त्यांनी चर्चा केली. स्थानिकांनी बोलताना तांबूस रंगाचा प्राणी पाहिल्याचे सांगितले. त्याच्या पावलांच्या ठशांचे निरीक्षणही केले. त्याच्या पावलांचा माग काढत ते कारंडेवाडी (महिम) हद्दीपर्यंत गेले होते. काही उभ्या पिकांमध्ये व ऊसामध्ये ही या प्राण्याचा शोध घेण्यात आला. मात्र लोकांनी वर्णन केलेला प्राणी कोठेही आढळून आला नाही. त्याच्या पावलांच्या ठशांवरून व प्रत्यक्षदर्शी लोकांनी सांगितलेल्या त्याच्या वर्णनावरून हा प्राणी बिबट्या नसून तरस असल्याचे श्री. देवकर यांनी सांगितले.

मोहोळमध्ये गाळपाविना दीड लाख टन ऊस; चार कारखाने कार्यरत
 
ठोंबरेवाडी, येडगेवाडी, कोळेकरवस्ती, कारंडेवाडी (महिम) या भागात ऊसाचे व इतर पिकांचे क्षेत्र जास्त आहे. काही ठिकाणी दाट झाडीसुद्धा आहे, तर काही ठिकाणी मोकळे माळरानही आहे. त्यामुळे हा परिसर जंगली प्राण्यांसाठी सुरक्षित आहे. त्यातच बिबट्या दिसल्याच्या अफवेने स्थानिक रहिवाशांमध्ये घबराटीचे वातावरण निर्माण झाले आहे. शनिवारी दिवसभर येथील शेतकऱ्यांनी शेतात जाण्याचे टाळले आहे. 

ताज्या बातम्यांसाठी डाऊनलोड करा ई-सकाळचे ऍप 

सकाळी लवकर वैरण आणण्यासाठी गेलो असताना मला विहिरीच्या खालच्या बाजूला तांबड्या रंगाचा प्राणी दिसला. मला पाहताच तो मकेच्या पिकात शिरला. त्याला पाहून मीही घाबरलो होतो. मात्र तो कोणता प्राणी आहे, हे मला नेमके माहित नाही. 
- पोपट ठोंबरे, ठोंबरेवाडी, महूद 

पावलांचे ठसे व वर्णनावरून लोकांनी पाहिलेला प्राणी हा तरस होता. तरस माणसावर हल्ला करत नाही. त्यामुळे धोका नाही, तरीही रहिवाशांनी लहान मुलांना एकटे बाहेर सोडू नये. या भागात दोन कर्मचाऱ्यांची नियुक्ती केली असून रात्रीच्या वेळेस फटाके फोडून या प्राण्याला हुसकावून लावण्यात येईल. 
- धनंजय देवकर, वनाधिकारी, सांगोला