सांगोला (सोलापूर): माणुसकीला काळीमा फासणारी घटना सांगोला तालुक्यातील एका गावात घडली आहे. दारुड्या वडीलांनीच आपल्या नऊ वर्षीय अल्पवयीन मुलीवर अत्याचार केला व हे कोणाला सांगितले तर नरड्यावर पाय देऊन मारुन टाकण्याची धमकी दिल्याच्या घटनेने खळबळ उडाली आहे.

सांगोला तालुक्यातील एका गावात राहणाऱ्या एकास दारूचे व्यसन होते. त्याची पत्नी मागील तीन महिन्यापासून घर सोडून गेली होती. त्यांना तीन मुली व एक मुलगा अशी अपत्ये असून त्यांची आई घर सोडून गेल्याने त्या लहान मुलांचा सांभाळ शेजारी करत होते. एके दिवशी ही भावांडे जेवण करुन झोपले असताना वडील रात्रीच्या वेळी दारूच्या नशेत घरी आला. त्यानंतर त्या दारुड्या नराधम बापाने आपल्या नऊ वर्षाच्या मुलीवर अत्याचार केला. तसेच सदरचा प्रकार कोणाला सांगितला तर तुझ्या नरड्यावर पाय देऊन जीवे मारून टाकीन, कशी मेली ते कुणाला कळणार नाही अशी धमकी दिली.

दरम्यान सदरचा घडलेला प्रकार त्या अल्पवयीन पीडित मुलीने सांभाळ करणाऱ्या शेजाऱ्यांना सांगितला. सदरचा प्रकार गंभीर असल्याने त्यांनी लागलीच सांगोला पोलीस ठाण्यात कळवले. त्यानंतर सदर पीडित मुलगी, तिची आजी, मामा व सांभाळ करणारे शेजारी हे सर्वजण सांगोला पोलिस ठाण्यात आले. सदरची घटना घडून पाच सहा दिवस झाले आहेत. नराधम बापाविरुद्ध सांगोला पोलीस ठाण्यात गुन्हा दाखल करण्यात आला आहे.