सोलापूर : शिवीगाळीतून भांडण झाल्यानंतर दोघांनी सदर बझार पोलिस ठाण्यात परस्परविरुध्द तक्रारी दाखल केल्या. त्यानंतर तक्रारदारावर कारवाई न करण्यासाठी सर्जेराव शंकर पाटील या पोलिसाने त्या तक्रारदाराकडे दहा हजार रुपयांच्या लाचेची मागणी केली. त्यातील दोन हजार रुपये स्वीकारताना लाचलुचपत प्रतिबंधक विभागाने सर्जेराव पाटील यास रंगेहाथ पकडले.

पोलिसांत परस्परविरोधात तक्रार दाखल झाल्यानंतर एकाने आपल्यावर काही कारवाई होऊ नये म्हणून पोलिस नाईक सर्जेराव शंकर पाटील याच्याकडे मागणी केली. त्यावेळी पाटील याने तक्रारदाराला दहा हजार रुपये मागितले. रक्‍कम मोठी असल्याने तक्रारदाराने तडजोड करून पाच हजार रुपये देण्याचे मान्य केले. त्यावेळी ती रक्‍कम दोन टप्प्यात देण्याचे निश्‍चित झाले. दोन हजार रुपयांची लाच घेताना पाटील याला लाचलुचपत प्रतिबंधक विभागाने रंगेहाथ पकडले आणि सदर बझार पोलिस ठाण्याचे वरिष्ठ पोलिस निरीक्षक कमलाकर पाटील यांना माहिती देऊन पाटील यास अटक केली. त्याच्याविरुध्द सदर बझार पोलिसांत गुन्हा दाखल करण्यात आला आहे. ही कारवाई लाचलुचपत प्रतिबंधक विभागाचे उपअधीक्षक संजीव पाटील यांच्या मार्गदर्शनाखाली पोलिस निरीक्षक उमाकांत महाडीक यांच्या पथकाने केली.

पोलिस ठाण्यातच घेतली लाच

तक्रारदारावरील कारवाई टाळण्यासाठी पोलिस नाईक सर्जेराव पाटील याने थेट पोलिस ठाण्यात त्याला बोलावून लाच स्वीकारली. त्याबद्दल पोलिस ठाण्यातील कुणालाही मागमूस लागला नाही. परंतु, त्याठिकाणी दबा धरुन बसलेल्या लाचलुचपत प्रतिबंधक विभागाने दोन हजार रुपये स्वीकारल्यानंतर सर्जेराव पाटील याला रंगेहाथ पकडले. आता त्याला सोमवारी (ता. 6) न्यायालयात हजर केले जाणार असून, लाच घेताना पकडलेल्या पाटील याच्यावर पोलिस आयुक्‍त हरिष बैजल हे निलंबनाची कारवाई करणार का, याकडे लक्ष लागले आहे. पोलिस विभागातील वाढत्या लाचखोरीमुळे हे खाते बदनाम होऊ लागले आहे. त्यामुळे असे प्रकार भविष्यात होणार नाहीत, यादृष्टीने ठोस पाऊल उचलण्याची गरज व्यक्‍त केली जात आहे.