सोलापूर : कोरोनाचा संसर्ग रोखण्यासाठी सरकारने जाहीर केलेला लॉकडाउन यशस्वी करण्यासाठी पोलिस अधिकारी व कर्मचारी दिवसरात्र सेवेत आहेत. लॉकडाउनचे उल्लंघन करणाऱ्यांची करामत सोलापुरात आज बघायला मिळाली आहे. लॉकडाउन काळात सेवा बजावणाऱ्या पोलिस कॉन्स्टेबलला ढकलून देऊन त्यांना मारहाण करून गळा दाबल्याची घटना सोलापुरात घडली. अशीच दुसरी एक घटना सोलापुरात घडली असून पोलिस उपनिरीक्षकासोबत हुज्जत घालण्यात आली. सोलापुरातील जोडभावी पेठ पोलिस ठाण्याचे पोलिस कॉन्स्टेबल असिफ मौला शेख हे बुधवारी सातच्या सुमारास वस्ताद गणपतीसमोरील सार्वजनिक रोडवर सेवा बजावत होते. 

हेही वाचा - संपर्कात आलेल्या 50 जणांची तपासणी सुरू 

या भागात नागरिकांनी गर्दी करू नये यासाठी सूचना देत होते. या परिसरात गप्पा मारत थांबलेल्या युवकांना घरी जाण्यास पोलिस कॉन्स्टेबल शेख यांनी सांगितले. त्या युवकांनी पोलिस कॉन्स्टेबलसोबत हुज्जत घातली. हुज्जत घालणाऱ्या त्या युवकांना पकडण्यास गेलेल्या पोलिस कॉन्स्टेबलला त्यातील युवकांनी ढकलून दिले. शेजारी असलेल्या कचराकुंडीतील कचरा जाळण्यात येत होता. त्या कचराकुंडीत पोलिस कॉन्स्टेबलचा हात पडल्याने त्यांच्या उजव्या हाताला जखमा झाल्याची माहिती पोलिस कॉन्स्टेबल शेख यांनी फिर्यादीत दिली आहे. याप्रकरणी विकास विठ्ठल सरवदे (रा. जोशी गल्ली, रविवार पेठ, सोलापूर) याच्यावर जोडभावी पेठ पोलिस ठाण्यात गुन्हा दाखल करण्यात आला आहे. जेलरोड पोलिस ठाण्याचे पोलिस उपनिरीक्षक शशिकांत लोंढे हे बुधवारी (ता. 15) नवीन अक्कलकोट नाका येथे सेवेत असताना अमोगसिद्ध पीरप्पा जाधव (रा. नितीननगर) हे चारचाकीतून बाहेर पडले होते. तुमच्याकडे पास आहे का? अशी विचारणा लोंढे यांनी जाधव यांच्याकडे केली. मी पत्रकार आहे. मला पासची गरज नाही असे सांगून जाधव हे अंगावर धावून आल्याची फिर्याद पोलिस उपनिरीक्षक लोंढे यांनी एमआयडीसी पोलिसांत दिली आहे.