वाळूज (सोलापूर) : मृगाच्या पहिल्या पावसाने बुधवारी (ता.10) रात्री मोहोळ तालुक्‍यात वाळूज, देगावसह परिसरात दमदार हजेरी लावली. वाफसा होताच बळीराजा खरिपाच्या पेरणीला सुरवात करणार आहे. पेरणीसाठी आवश्‍यक कुळव, तिफण ही अवजारे दुरुस्तीसाठी सुताराच्या नेटावर शेतकऱ्यांची लगबग सुरू झाली आहे. 

हेही वाचा : फळपीकविमा योजनेच्या अंमलबजावणीसाठी समिती

नागझरी नदीला गुडघाभर पाणी 
रात्री आठ वाजण्याच्या सुमारास मृग नक्षत्राच्या पहिल्याच दमदार पावसाने वाळूज परिसरातील देगाव, भैरववाडी, मनगोळी (ता. मोहोळ) तसेच साखरेवाडी, भागाईवाडी (उत्तर सोलापूर) शिवारात तीन ते चार तास दमदार हजेरी लावली. जोरदार पावसाने वाळूज येथील भोगावती व नागझरी नदीला गुडघाभर पाणी होते. पावसाने शेतकरी सुखावला असून वाफसा होताच खरिपाच्या पेरणीला सुरवात करणार आहे. 

हेही वाचा : अकलूजमधील गुळवेनगरात आढळला कोरोनाबाधित रुग्ण

शेतकऱ्यांची लगबग सुरू 
आवश्‍यक बी-बियाणे, खतांची जुळवाजुळव सुरू झाली आहे. पेरणीस आवश्‍यक अवजारे दुरुस्त करण्यासाठी लोहार व सुताराच्या नेटवर शेतकऱ्यांची लगबग सुरू आहे. पूर्वी बैलांवर अवलंबून असलेली शेती आता ट्रॅक्‍टरचा वापर करून यांत्रिक पद्धतीने केली जात आहे. मात्र, काही शेतकरी आजही बैलाच्या साहाय्याने तिफणीच्या चाड्यावर मूठ धरून पेरणी आणि नांगर व कुळवाच्या रुमण्यावर भार देऊन शेतीची मशागत करतात. 

सर्जा- राजाच्या जीवावरच शेती 
आज ट्रॅक्‍टरच्या साहाय्याने अनेक शेतकरी शेती करत असले तरी आमच्यासारखा अनुभवी शेतकरी सर्जा- राजाच्या जीवावरच शेती पिकवतो. 
- इंद्रसेन मोटे, शेतकरी, वाळूज