Mohol - मोहोळ नगरपरिषदेने कृषी उत्पन्न बाजार समितीच्या आवारात सिमेंट काँक्रीटचे रस्ते केले आहेत, ते रस्ते कोणत्या निधीतून केले आहेत, तसेच ते रस्ते नगरपरिषद प्रशासनाकडे वर्ग केले आहेत काय? या मागणी साठी मोहोळ विधानसभा मतदारसंघाचे कार्याध्यक्ष मंगेश पांढरे यांनी नगरपरिषदेचे मुख्याधिकारी यांच्या दालना समोर अर्धनग्न आंदोलन सुरू केले आहे.

मोहोळ नगर परिषदेने मोहोळ कृषी उत्पन्न बाजार समितीच्या आवारात गेल्यास सुमारे नऊ महिन्यापूर्वी सिमेंट काँक्रीटचे रस्ते केले आहेत. हे रस्ते कोणत्या निधीतून केले आहेत तसेच केलेले रस्ते नगर परिषदेकडे वर्ग केले आहेत का केले असतील तर ते कधी केले याची माहिती पांढरे यांनी नगर परिषदेला दोन वेळा लेखी पत्राद्वारे मागितली होती.

मात्र ती माहिती देण्यास नगर परिषदेने टाळाटाळ केली. तसेच माहिती कधी देणार या बाबतचे लेखी पत्र ही पांढरे यांना दिले नाही. त्यामुळे त्यांनी शुक्रवार ता 6 रोजी नगरपरिषदेच्या मुख्याधिकारी यांच्या दालना समोर अर्धनग्न आंदोलन सुरू केले आहे.

नगरपरिषदेने असे कोट्यावधी रुपये खर्चून खाजगी जागेत रस्ते केले आहेत, या बाबत असा आरोपही पांढरे यांनी केला आहे. माहिती न मिळाल्यास जिल्हाधिकारी कार्यालया समोर यापेक्षा तीव्र आंदोलन करणार असल्याचे पांढरे यांनी सांगितले.

दरम्यान या संदर्भात बांधकाम विभागाचे अभियंता गणेश बागल यांच्याशी दूरध्वनीवरून संपर्क साधण्याचा प्रयत्न केला असता त्यांनी प्रतिसाद दिला नाही.

पांढरे यांच्या आंदोलनाचा विषय नगरपरिषदेतील बांधकाम विभागाचा आहे. त्यामुळे ते अधिकारी पाहून घेतील.

डॉ योगेश डोके, मुख्याधिकारी मोहोळ नगरपरिषद