पंढरपूर : महाराष्ट्र राज्य परिवहन महामंडळाने पंढरपूर येथील कृषी उत्पन्न बाजार समिती समोरील तब्बल १५ एकर जागेमध्ये २३ कोटी रुपये खर्चून राज्यातील सर्वात मोठे नवीन चंद्रभागा बस स्थानक उभारले आहे. मागील आषाढी यात्रे दरम्यान या बसस्थानकाचा तात्पुरता वापर करण्यात आला होता. मात्र नियमित वापरासाठी हे बस स्थानक अद्यापही उद्घाटनाच्या प्रतीक्षेत आहे.
पंढरपूर हे राज्यातीलच नव्हे तर देशभरातील महत्त्वाचे तीर्थक्षेत्र आहे. श्री विठ्ठलाच्या दर्शनासाठी दररोज सुमारे ५० हजार तर आषाढी कार्तिकी यात्रेच्या दरम्यान लाखो भाविकांचे पंढरीमध्ये आगमन होत असते. राज्यभरातील लाखो भाविक पंढरपूरमध्ये येजा करण्यासाठी एसटी महामंडळाच्या बस गाड्यांमधून मोठ्या प्रमाणावर प्रवास करतात.
या प्रवाशांच्या सुविधे करिता एसटी महामंडळाने पंढरपूर मध्ये नवीन चंद्रभागा बस स्थानक उभारले आहे. या प्रशस्त व अद्ययावत बसस्थानकामध्ये प्रवासासाठी अनेक सोईसुविधा उपलब्ध केल्या आहेत.
१५ एकर जागेमध्ये सुमारे ७० हजार चौरस फुट क्षेत्रफळ असलेली बस स्थानकाची अद्ययावत इमारत बांधून तयार आहे. या इमारती मध्ये एकूण ३४ फलाट असून दररोज सुमारे ५ हजार बसेसची येजा करण्याची क्षमता आहे.
राज्यातील सर्वात मोठे बस स्थानक असलेल्या या स्थानकामध्ये प्रवासी व एस टी महामंडळाच्या कर्मचाऱ्यांसाठी निवासाची सोय उपलब्ध करण्यात आली आहे. या इमारतीची रंगरंगोटीसह अंतर्गत सजावट व इलेक्ट्रिकची कामे देखील पूर्ण करण्यात आली आहेत. फलाट परिसरामध्ये लाईट व पंखे देखील बसविण्यात आले आहेत.
बस स्थानक बाह्यपरिसरात प्रकाश व्यवस्थेसाठी जागोजागी हाय मास्ट लॅम्प देखील उभारले आहेत. एकंदरीतच हे नवीन चंद्रभागा बस स्थानक सर्व सोयी सुविधांनी सुसज्ज असून आता उद्घाटनाच्या प्रतीक्षेत आहे.
मागील आषाढी यात्रेच्या वेळी या बस स्थानकाचा तात्पुरता वापर करण्यात आला होता. येत्या कार्तिकी यात्रेच्या दरम्यान देखील या बस स्थानकाचा प्रशासन वापर करणार आहे. मात्र नियमित वापरासाठी हे बस स्थानक अद्यापही उद्घाटनाच्या प्रतीक्षेत आहे.
सध्या एस टी महामंडळ प्रशासन शहर पोलीस स्टेशन लगतच्या बस स्थानकाचा वापर करीत आहे. या बस स्थानकांमध्ये प्रवाशांसाठी कोणत्याही सुविधा उपलब्ध नाहीत. त्यामुळे अद्ययावत सोयीसुविधांनी सज्ज असलेल्या नवीन चंद्रभागा बस स्थानकाचे उद्घाटन केव्हा होणार असा सवाल लाखो प्रवाशांमधून विचारला जात आहे.
चंद्रभागा बस स्थानकाची वैशिष्ट्ये
बस स्थानकाचा १५ एकर परिसर
२३ कोटी रुपये खर्चून ७० हजार चौ.फूट बांधकाम
एकूण ३४ फलाट व १८ व्यापारी गाळे
राज्यातील सर्वात मोठे बस स्थानक
महिला व दिव्यांग निवासासाठी स्वतंत्र सोय
दररोज सुमारे ५ हजार बसेसची क्षमता
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.