बार्शी(सोलापूर)ः शहरातील टेलिफोन कॉलनी परिसरातील लिंबाच्या व वडाच्या वृक्षांचा वाढदिवस साजरा करून वृक्ष संवर्धन समितीचा वर्षपूर्ती सोहळा संपन्न झाला. 
अध्यक्षस्थानी वडाचे झाड तर प्रमुख पाहुणे म्हणून लिंबाचे झाडाची निवड करण्यात आली होती. एक वर्षापूर्वी लागवड केलेले हे वृक्ष संगोपन करून वाढवले आहेत. 

हेही वाचाः पाण्याचा फवारा मारत वाचविला 70 वर्षीय आजीचा जीव 

पर्यावरणदिनी हा उपक्रम राबविण्यात आला. वृक्ष संवर्धन समितीच्या कार्याला वृक्षप्रेमी अभिनेते सयाजी शिंदे यांच्या मार्गदर्शनाखाली आज एक वर्ष पूर्ण झाले. जागतिक पर्यावरण दिनानिमित्त कार्यक्रमाचे आयोजन करण्यात आले होते. 

हेही वाचाः दुकाने सुरु, व्यापाऱ्यांनी झटकली अडीच महिन्यांची धूळ 

शहरात मागील वर्षी 5 जून 2019 रोजी सर्व वृक्षप्रेमींनी एकत्र येऊन वृक्ष संवर्धन समितीची स्थापना केली. उपळाई रोडची जुनी ओळख असलेल्या या ठिकाणी दोन कडुलिंबाच्या वृक्षांची लागवड करून प्रारंभ करण्यात आला होता. या चळवळीत बार्शीसह तालुक्‍यातील वृक्षप्रेमी नागरिक सामील झाले. शहरातील पाच खुल्या जागा हरित करून सुमारे तीन हजार वृक्षांची लागवड व त्यांचे संवर्धन समितीच्या माध्यमातून मागील वर्षभरात करण्यात आले. कार्याला एक वर्ष पूर्ण होऊन समितीने लावलेल्या पहिल्या झाडाचा वाढदिवस साजरा करण्यात आला. 
याप्रसंगी अजित कुंकूलोळ, नगरसेवक विजय चव्हाण, समितीचे अध्यक्ष उमेश काळे, दीपक गुंड, शशिकांत धोत्रे, उदय पोतदार, सुधीर खाडे, भगवान जाधव, वैभव पाटील, संपत देशमुख, सचिन शिंदे, प्रफुल्ल गोडसे, बाबासाहेब बारकुल, अमित झांबरे, अण्णा पेटकर, स्वप्नील पांडे, योगेश गाडे, राहुल काळे, अक्षय घोडके, अमृत खेडकर, नलवडे, अमित देशमुख, सयाजी गायकवाड, उमाकांत ठोकळ, ऋषिकांत पाटील, राणा देशमुख, सुमीत जगदाळे, अक्षय गुंड उपस्थित होते. समितीच्या कार्याचा गौरव करून भावी कार्यास शुभेच्छा दिल्या. यावेळी उदय पोतदार यांनी वृक्षाची प्रार्थना सादर केली. अतुल पाडे यांनी प्रास्ताविक केले. सुधीर वाघमारे यांनी सूत्रसंचालन केले.