सोलापूरः जिल्हाभरात बॅंकांच्या कर्ज वसुलीसाठीच्या मुदतवाढीच्या संमतीला अल्प प्रतिसाद देत नव्वद टक्के कर्जदारांनी त्यांच्या कर्जाचा नियमित हफ्ते भरणा सुरू करण्यास प्राधान्य दिले आहे. 

हेही वाचाः बियाणे न उगवल्याच्या प्रकरणी विक्रेत्यांनी काय घेतली भूमिका? हे वाचा 

बॅंकाच्या कर्ज वसुलीबाबत पहिल्यांदा तीन महिन्यांची मुदत वाढ देण्यात आलेली होती. दुसर्या टप्प्यात कर्जाची मुदत पुन्हा तीन महिने वाढवल्यानंतर बॅंकांनी कर्जदारांना सुचना मागवून त्यांना पुढील तिन महिन्याची मुदतवाढ हवी किंवा नाही याची विचारणा केलेली होती. कर्जदारांनी प्रतिसादाची नोंद करण्यास सांगितले होते. काही बॅंकांनी ऑनलाइन पध्दतीने मुदतवाढीचे अप्लीकेशन अपलोड करण्याचे सुचवले होते. 

हेही वाचाः माळशिरसच्या या भागातही कोरोनाची एंट्री 

प्रत्यक्षात पहिल्या तिन महिन्यात कोरोनाची स्थिती बिकट असल्याने ग्राहक घराबाहेर पडले नाहीत. तेव्हा पहिल्या टप्प्यात सरसगट मुदतवाढ झाली. मात्र जुलै ते सप्टेंबर या कालावधीत कर्ज हफ्ता मुदतवाढीसाठी ग्राहकांकडून संमती मागवली होती. ज्यांनी समंती नोंदवली त्यांनाच फक्त मुदत वाढ मिळाली आहे. उर्वरीत बहूतांश ग्राहक नियमित कर्ज हफ्ता भरणा प्रक्रियेत सहभागी झाले आहेत. त्यांचा कर्जहफ्ता भरणा नियमीत सुरु झाला आहे. या मुदतवाढीच्या प्रक्रीयेत व्याज सवलत नाही. त्यामुळे या कालावधीत कर्जावरील व्याज सुरूच राहणार आहे. व्याजाचा भुर्दंड बसणारच असेल तर मग हफ्ता भरलेला बरा असे म्हणून कर्जदार हफ्ता भरणा करीत आहेत. ज्यांचे आर्थीक स्त्रोत सुरू आहेत त्यांची कर्ज वसुली बऱ्यापैकी नियमित सुरु झाली. व्यावसायिकांनी त्यांचे व्यवसाय सुरु न झाल्याने मुदतवाढ घेतली. पण ही कर्ज वसुली बॅंकाच्या अर्थकारणासाठी  सकारात्मक मानली जाते.  या कर्ज फेडीसोबत बॅंकाकडून नविन कर्ज वाटप देखील सुरू झाले आहे. 

अर्धवार्षिक कामगिरीकडे लक्ष 
बॅंकींग क्षेत्राचे अर्धे आर्थिक वर्षे हे सप्टेंबर अखेर संपते. त्यामुळे सप्टेंबरच्या शेवटी होणाऱ्या ताळेबंदामध्ये कोरोना संकटाचे बॅंकावरील परिणाम स्पष्टपणे पाहण्यास मिळणार आहे. याकडे बॅंक क्षेत्रातील जाणकार मंडळी लक्ष ठेवून आहेत. 

सुचनांची प्रतिक्षा 
अर्धवार्षिक ताळेबंदाच्या दृष्टीने येत्या काही दिवसात रिझर्व्ह बॅंकेच्या सुचनांची मोठी प्रतिक्षा नागरी बॅंकाना आहे. या मार्गदर्शक सुचनानुसारच पुढील काळात बॅंकींग क्षेत्राची वाटचाल सुरु राहील. 
- श्रीकांत मोरे, अध्यक्ष मनोरमा मल्टीस्टेट बॅंक सोलापूर.