सोलापूर : जनरल नर्सिंग मिडवायफरी सर्टिफिकेट देण्याचे आमिष दाखवून पुणे जिल्ह्यातील सहा जणांना पाच लाखाला फसविल्याची घटना समोर आली आहे. या प्रकरणी बोरामणी मोहोळकर तांडा (ता. दक्षिण सोलापूर) येथील बाळू गणू चव्हाण याच्याविरुद्ध सदर बाजार पोलीस ठाण्यात फसवणुकीचा गुन्हा दाखल झाला आहे. धीरज नंदकिशोर ठाकूर (रा. खडकवासला, एकता विहार, पुणे) यांनी तक्रार दिली आहे. 

हेही नक्‍की वाचा : बळीराजाची कोंडी ! मध्यम अन्‌ दिर्घ मुदतीची कर्जमाफी नाहीच 

पुणे येथील स्वारगेट भागात एका कार्यक्रमानिमित्त फिर्यादी धीरज ठाकूर आणि आरोपी बाळू चव्हाण यांची ओळख झाली. त्यानंतर आरोपीने फिर्यादीच्या पत्नीचे ओटी असिस्टंट सर्टिफिकेट बदलून ओटी नर्सिंग सर्टीफिकीट देण्याचे आमिष दिले. त्यासाठी 40 हजार रुपये घेतले. तसेच बनावट सर्टिफिकेटही आरोपीने फिर्यादीला दिले. या प्रकारानंतर फिर्यादीच्या ओळखीच्या तबस्सुम खान यांना जनरल नर्सिंग मिडवाफरीचे सर्टिफिकेट देण्याकरिता आरोपीने 60 हजार रुपये घेतले. त्यानंतर आरोपीने जनरल नर्सिंग मिडवाफरी सर्टिफिकेटची गरज असलेल्या वंदना दिलीप चव्हाण, मेघा साळुंखे, सुरेखा वाघोले व सूर्यकांत चौरे यांच्याकडून एकूण पाच लाख रुपये घेतले. त्याबदल्यात त्यांना बनावट सर्टिफिकेट दिले. त्यातील सुजाता पुरी यांनी डिसेंबर 2019 मध्ये त्या सर्टिफिकेटची सत्यता पडताळणीसाठी ऑनलाइन तपासणी केली. त्यावेळी त्यांना ते सर्टिफिकेट दुसऱ्याच व्यक्तीच्या नावे नोंद असल्याचे दिसून आले. त्यांनी याबाबत फिर्यादीला माहिती दिली. त्यामुळे फिर्यादीने त्यांच्या पत्नीच्या नावे असलेल्या सर्टिफिकेटचीही पडताळणी केली. त्यावेळी सर्व सर्टिफिकेट बनावट असल्याचे आढळून आले. दरम्यान, हा गुन्हा वळसंग पोलिस ठाण्याच्या हद्दीत घडल्याने पुढील तपासा वळसंग पोलिस ठाण्याकडे वर्ग करण्यात आला आहे. 

हेही नक्‍की वाचा : धक्‍कादायक ! 'कोरोनो'मुळे एन-95 मास्कची साठेबाजी 

दहा मिनिटात पळविले पन्नास हजारांचे नेकलेस 
सोलापूर : घराचा दरवाजा उघडा असल्याची संधी साधून अनोळखी चोरट्यांनी घरात प्रवेश केला. कपाटात ठेवलेले सुमारे 50 हजार रुपयांचे नेकलेस 10 मिनिटात लंपास केल्याची घटना विजयपूर रोडवरील भिमाई नगरात घडली. 

हेही नक्‍की वाचा : खुषखबर ! बोरामणी विमानतळ 2021 पर्यंत सुरु होणार 

विजयपूर रोड परिसरातील भिमाई नगरात मुस्कान गुलाब उर्फ सुरज शेख (वय 22) बुधवारी सकाळी साडेअकरा वाजण्याच्या सुमारास घरातील काम करीत होत्या. त्यावेळी त्यांनी घराचा दरवाजा पुढे केला होता. घरातील कामानिमित्त त्या काही वेळासाठी दुसऱ्या ठिकाणी गेल्या होत्या. याच संधीचा फायदा घेऊन अनोळखी चार इसम त्याठिकाणी पोहचले. त्यांनी घरातील किचनमधील लोखंडी कपाटातील ड्रॉव्हरमध्ये ठेवलेले सुमारे 50 हजार रुपयांचे सोन्याचे नेकलेस पळविले. या प्रकरणी मुस्कान शेख यांनी विजापूर नाका पोलीस ठाण्यात फिर्याद दिली. त्यानुसार चार अनोळखी व्यक्‍तींविरुध्द गुन्हा दाखल करण्यात आला असून पोलिस उपनिरीक्षक श्री. बेंबडे हे या प्रकरणाचा तपास करीत आहे.