सोलापूर ः जिल्ह्यातील स्वस्त धान्य दुकानदारांनी एक जूनपासून संप सुरू केला आहे. कोरोनाच्या पार्श्‍वभूमीवर रेशन दुकानदार व मदतनीस यांना 50 लाख रुपयांचे विमा संरक्षण मिळावे, अशी मागणी त्यांनी केली आहे. या मागणीसाठी त्यांनी संप सुरू केला आहे. त्याचबरोबर जून महिन्याचे धान्य न उचलण्याचा निर्णयही त्यांनी घेतला आहे. 
कोरोनाच्या पार्श्‍वभूमीवर दुकानदारांनी हा निर्णय घेतला आहे. रेशन दुकानदारांच्या संपर्कात कोरोनाबाधित रुग्ण आल्याने त्याची बाधा दुकानदार व मदतनीस यांना होऊन त्यांचा मृत्यू झाला आहे. त्यामुळे अशा गंभीर स्थितीमध्ये रेशन दुकानदार व मदतनीसांच्या जीविताचे संरक्षण करण्याची जबाबदारी शासनाची आहे. त्यामुळे 50 लाख रुपयांचे विमा संरक्षण देण्याची मागणी त्यांनी केली आहे. ऑल महाराष्ट्र फेअर प्राईज शॉपकिपर्स यांचे आदेश येईपर्यंत संप मागे घेतला जाणार नसल्याचेही त्यांनी जिल्हाधिकाऱ्यांना दिलेल्या निवेदनात म्हटले आहे.