महूद (सोलापूर) : जुजारपूर येथील रूपाली नारायण पाटील (वय 28) या विवाहितेचा शुक्रवारी (ता. 22) पहाटे पाच वाजण्याच्या पूर्वी मानेला गंभीर इजा करून खून (Crime) करण्यात आला होता. शिवाय हे प्रकरण उघडकीस येऊ नये म्हणून संबंधित विवाहितेचा मोबाईलही घेऊन मारेकरी फरार झाला होता. मात्र, सांगोला पोलिसांनी (Sangola Police) गतिमान तपास करत अवघ्या 24 तासांत संशयिताच्या मुसक्‍या आवळल्या आहेत. या प्रकरणी गावातील सुधाकर मच्छिंद्र हिप्परकर या तरुणास अटक करण्यात आली आहे.

जुजारपूर येथील रूपाली नारायण पाटील (वय 28) या विवाहितेचा पती कंटेनरवर चालक असून, तो परगावी गेला असताना शुक्रवारी (ता. 22) पहाटे पाच वाजण्याच्या पूर्वी रूपालीच्या मानेला गंभीर इजा करून खून करण्यात आला होता. शिवाय हे प्रकरण उघडकीस येऊ नये म्हणून संबंधित विवाहितेचा मोबाईलही घेऊन मारेकरी फरार झाला होता. याप्रकरणी खून झालेल्या विवाहितेचा चुलत दीर दादासाहेब दगडू पाटील यांनी सांगोला पोलिसात फिर्याद दिलेली आहे.

सुधाकर मच्छिंद्र हिप्परकर यास सांगोला न्यायालयात हजर केले असता त्याला शुक्रवार (ता. 29) पर्यंत पोलिस कोठडी सुनावली आहे. दरम्यान, या खून प्रकरणात आणखी कोणाचा सहभाग आहे का? सदर आरोपीस कोणी मदत केली आहे का? याचा तपास पोलिस करीत असल्याचे तपास अधिकारी तथा सहाय्यक पोलिस निरीक्षक प्रशांत हुले यांनी सांगितले. पोलिस अधीक्षक तेजस्वी सातपुते, उपविभागीय पोलिस अधिकारी राजश्री पाटील, पोलिस निरीक्षक सुहास जगताप यांच्या मार्गदर्शनाखाली तपास अधिकारी तथा सहाय्यक पोलिस निरीक्षक प्रशांत हुले, पोलिस हवालदार असलम काझी, पोलिस नाईक तुकाराम व्हरे, पोलिस नाईक विजय थिटे, कॉन्स्टेबल गणेश कुलकर्णी यांनी गतिमान तपास करत केवळ चोवीस तासात गावातील सुधाकर मच्छिंद्र हिप्परकर या तरुणास अटक केली आहे.

दरम्यान, या खून प्रकरणाचा तातडीने तपास लावून मारेकऱ्याला कडक शासन करावे. या घटनेमुळे जुजारपूर येथील स्त्रिया व शाळेमध्ये शिकणाऱ्या मुली प्रचंड दहशतीखाली आहेत, अशा आशयाचे निवेदन जुजारपूर ग्रामस्थांनी पोलिस अधीक्षकांना दिले होते.