करमाळा (सोलापूर)ः कोरोना संकटातून सावरण्यासाठी करमाळा कृषी उत्पन्न बाजार समितीने गाळे भाडेधारकांना भाडे माफ केले आहे. तसेच उत्पन्न वाढीसाठी नवा पेट्रोलपंप व नवीन गाळे उभारणीचा निर्णय घेतला आहे. संकटात मदत करण्यासोबत व उत्पन्न वाढीचे नियोजन या माध्यमातून बाजार समितीने अभ्यासपूर्ण पध्दतीने कोरोना संकटाचे आर्थिक व्यवस्थापन केले आहे. 

हेही वाचाः शहर, जिल्ह्यात पावसाची रिपरिप 

करमाळा कृषी उत्पन्न बाजार समितीने गाळाधारकांचे व जागा भाडेकरूचे 2 महीन्यांचे भाडे माफ करण्याचा निर्णय सर्वांनुमते घेण्यात आला आहे. बाजार समितीच्या अंतर्गत एकुण 141 गाळे धारक आहेत. तसेच खुल्या जागांचे 40 भाडेकरू आहेत. त्यांना कोरोना संकटात ही मदत केली जाणार आहे. 
करमाळा कृषी उत्पन्न बाजार समितीच्या संचालक मंडळाच्या बैठकीत हा निर्णय घेण्यात आला आहे. सभापती प्रा. शिवाजी बंडगर यांचे अध्यक्षतेखाली ही बैठक झाली. 
माजी आमदार जयवंतराव जगताप यांनी सर्व संचालक मंडळाशी चर्चा केली. कोरोना विषाणू संसर्गामुळे देशात व राज्यात सर्वत्र लॉकडाउन जाहीर केल्याने सर्वच उद्योग व्यवसाय बंद आहेत. अशा स्थितीत बाजारसमितीचे गाळे भाड्याने दिले आहेत त्या भाडेकरूंची देखील व्यापार नसल्याने अडचण झाली आहे. बाजार समितीचे अंकित गाळे व जागा भाडेकरूंचे 2 महिन्यांचे भाडे माफ करुन या भाडेकरूंना दिलासा देणेबाबत निर्णय घेणेबाबत मुद्दा उपस्थित केला. 

हेही वाचाः चाके थांबली अन ट्रॅव्हल्स व्यवसाय थांबला 

त्यास अनुसरून गाळा व जागा धारकांचे सन 2020-21या आर्थिक वर्षात 2 महिन्याचे भाडे माफ करण्याचा निर्णय बैठकीत घेण्यात आला. सर्व कर्मचाऱ्यांनी कोरोना संकटामध्ये त्यांचा 2 महिन्याचा 50 टक्के पगार देउ केला आहे. यावेळी संचालक चंद्रकांत सरडे, सुभाष गुळवे,संतोष वारे,अमोल झाकणे,आनंदकुमार ढेरे यांचे सह सर्व संचालक उपस्थित होते. सभेचे आभार सचिव सुनील शिंदे यांनी मानले. 

उत्पन्न वाढीचे प्रयत्न 
बाजार समितीचे उत्पन्नवाढीचे दृष्टीने जेऊर येथे पेट्रोल पंप व गाळे बांधण्याचा निर्णय सर्वानुमते घेण्यात आला आहे

- प्रा. शिवाजी बंडगर, सभापती करमाळा कृषी उत्पन्न बाजार समिती