सोलापूर : राज्यातील अंगणवाड्यांमधील सेविका व मदतनिसांच्या सहा हजार 500 पदांची भरती 553 एकात्मिक बालविकास सेवा प्रकल्पाअंतर्गत सुरु झाली असून 15 मार्चपर्यंत प्रक्रिया संपविण्याचे नियोजन महिला व बालविकास विभागाने केले आहे. राज्यातील बेरोजगारी पाहता साडेसहा हजार जागांसाठी तब्बल एक लाख अर्ज येतील, असा अंदाज आहे. त्यामुळे पात्र उमेदवारांची यादी संबंधित ग्रामपंचायतींबाहेर लावून पादरर्शक निवड करावी, असे निर्देश देण्यात आले आहेत. 

हेही नक्‍की वाचा : सिध्देश्‍वर एक्‍स्प्रेसच्या तांत्रिक तपासणीवर प्रश्‍नचिन्ह 

महाविकास आघाडीने राज्यातील सुशिक्षित तरुण- तरुणी, महिलांच्या नोकरीला प्राधान्य दिले आहे. गृहमंत्री अनिल देशमुख यांनी राज्यात आठ हजार पोलिसांच्या भरतीचा निर्णय घेतला. त्यानुसार पोलिस भरतीची प्रक्रिया सुरु झाली आहे. तर महिला व बालविकास मंत्री ऍड. यशोमती ठाकूर यांनी 18 जानेवारीला पदभरतीचा निर्णय घेतला आणि आता अंगणवाडी सेविका व मदतनिसांच्या भरती प्रक्रियेला प्रारंभही झाला. राज्यात 97 हजार 260 अंगणवाडी केंद्रे आहेत, तर 11 हजार 84 मिनी अंगणवाडी केंद्रे आहेत. त्याअंतर्गत चार हजार पर्यवेक्षिका आणि दोन लाख अंगणवाडी सेविका व मदतनीस कार्यरत आहेत. वाढीव मानधनासह अंगवाडी सेविकांना आता आठ हजार 500 रुपये तर मदतनीस महिलेला चार हजार 500 रुपये मानधन दिले जात आहे. गावातील महिलेला गावातच काम मिळणार असल्याने अर्जाची संख्या वाढेल, असा अंदाज आहे. अर्जाची छाननी करुन गुणवत्ता पात्र महिलेला संबंधित पदावर नियुक्‍ती दिली जाणार आहे. 

हेही नक्‍की वाचा : समाज कल्याणच्या सहायक आयुक्‍तांची मनमानी...'या' योजनेपासून लाभार्थी दूरच 

गावातील महिलाच त्या अगणवाडीसाठी पात्र 
राज्यातील 553 एकात्मिक बालविकास सेवा प्रकल्पाअंतर्गत अंगणवाडी सेविका व मदतनीस पदांसाठी अर्ज मागविण्यात येत आहेत. संबंधित गावातील महिलाच त्या पदांसाठी पात्र असतील. अर्जदारांची गुणवत्ता यादी संबंधित ग्रामपंचातीबाहेर लावण्याचे निर्देश देण्यात आले आहेत. 
- जामसिंग गिरासे, उपायुक्‍त, आरोग्य व कुपोषण, मुंबई 

हेही नक्‍की वाचा : वैद्यकीय क्षेत्रातील डॉक्‍टन अन्‌ विद्यार्थ्यांसाठी पर्वणी 

ठळक बाबी... 

• मदतनीस महिला कर्मचाऱ्यांना सेविका पदांवर मिळणार पदोन्नती 
• गावातील रहिवाशी दाखला असलेल्या महिलांनाच करता येणार अर्ज 
• 15 मार्चपूर्वी साडेसहा हजार पदांची भरती करण्याचे महिला व बालविकास विभागाचे नियोजन 
• बाल विकास प्रकल्प अधिकाऱ्यांच्या 45 पदांसाठी दहा हजारांपर्यंत अर्ज 
• नव्या 98 अंगणवाड्या अन्‌ 745 मिनी अंगणवाड्यांमध्ये नव्या सेविका व मदतनीस महिलांची भरती