सोलापूर : लॉकडाउनमुळे गरीब आणि गरजू लोकांच्या भोजनाची व्यवस्था होण्यासाठी जिल्ह्यातील तालुक्‍याच्या ठिकाणी शिवभोजन केंद्रे सुरू करण्यास परवानगी देण्यात आली होती. यापैकी 11 ठिकाणी शिवभोजन केंद्रे आज सुरू झाली. या 11 ठिकाणी 935 लोकांनी शिवभोजन थाळीचा लाभ घेतल्याची माहिती मिलिंद शंभरकर यांनी आज दिली. 
हेही वाचा - कोरोना : प्रिसिजनची एक कोटींची मदत 
सोलापूर शहरातील पाच ठिकाणी शिवभोजन केंद्रे पुन्हा सुरू करण्यात आली आहेत. त्या पाच ठिकाणी 825 जणांनी शिवभोजन थाळीचा लाभ घेतला. जिल्ह्यातील 11 ठिकाणी आज शिवभोजन केंद्रे सुरू करण्यात आली. उर्वरित 12 ठिकाणी लवकरच ही केंद्रे सुरू करण्यात येणार असल्याचेही त्यांनी सांगितले. लॉकडाउनमुळे बेरोजगार झालेल्या मजुरांना जिल्हा प्रशासनातर्फे अन्न धान्य वाटप करण्याचे नियोजन करण्यात आले आहे. यासाठी जिल्ह्यातील दानशूर व्यक्ती आणि स्वयंसेवी संस्था यांची मदत घेतली जात आहे.