सोलापूर : शिरवळ (ता. अक्‍कलकोट) या गावात पहाटेच्या सुमारास सहा दरोडेखोरांनी दोन घरांवर दरोडा (Robbery) टाकून सव्वासहा लाखांचा मुद्देमाल चोरून नेला आहे. मागील तीन दिवसांपासून पोलिसांची (Police) चार पथके दरोडेखोरांचा शोध घेत आहेत. परंतु, अद्याप त्यांचा मागमूस लागलेला नाही. शिरवळ दरोड्यानंतर तीन दिवसांनी बारुळ (ता. तुळजापूर) (Tiljapur) या गावात त्याच पद्धतीने दरोडा टाकल्याची माहिती अक्‍कलकोट (Akkalkot) पोलिसांना मिळाली. पोलिसांनी त्या ठिकाणी जाऊन माहिती घेतली.

जेवण करून सर्वजण गाढ झोपेत असताना दरोडेखोरांनी 29 ऑक्‍टोबरच्या पहाटे दोनच्या सुमारास शिरवळ येथील दोन घरात धाडसी दरोडा टाकला. दरोडेखोरांनी त्या दोन घरातील तिघांना मारहाण करीत घरातून एक लाख 40 हजारांची रोकड व 17 तोळे सोने घेऊन ते पसार झाले. एकूण सहाजण होते, असे दरोडा पडलेल्या कुटुंबातील सदस्यांनी पोलिसांना सांगितले. घटनेचे गांभीर्य ओळखून पोलिस अधीक्षक तेजस्वी सातपुते, अप्पर पोलिस अधीक्षक हिम्मत जाधव यांनी अक्‍कलकोट पोलिसांची दोन तर गुन्हे शाखेची दोन पथके त्या दरोडेखोरांच्या मागावर सोडली आहेत.

त्या दरोडेखोरांचा शोध घेताना तुळजापूर तालुक्‍यातील बारुळ येथे तशाच प्रकारचा दरोडा पडल्याची माहिती पोलिसांना मिळाली. त्यानंतर अक्‍कलकोट उत्तर पोलिस ठाण्याचे पोलिस निरीक्षक अनंत कुलकर्णी यांनी स्वत: त्या गावातील दरोडा पडलेल्या कुटुंबाची भेट घेतली. तसेच तेथील पोलिसांकडूनही माहिती घेतली. पुढील तपासासाठी त्याचा उपायोग होईल, असा पोलिसांना विश्‍वास आहे. दरम्यान, ग्राम सुरक्षा यंत्रणेमुळे बऱ्याच ठिकाणी चोरीचे प्रयत्न फसले असून सर्वांनी सतर्क राहावे, असे आवाहन पोलिसांनी केले आहे.

...तर नाकाबंदीतून दरोडेखोरांना पकडणे शक्‍य होते

शिरवळ येथे दरोडा पडल्यानंतर काही वेळातच गावातील कोणीतरी बीट अंमलदाराला कॉल केला. परंतु, त्यांनी घटना गांभीर्याने घेतली नाही. त्यांना कॉल करूनही त्यांनी पोलिस ठाण्यातील कोणालाच निरोप दिला नाही. गांभीर्य ओळखून त्यांनी तत्काळ निरोप दिला असता तर नाकाबंदी करून त्यांना पकडता आले असते. परंतु, तसे काहीच झाले नाही, त्यामुळे संबंधित बीट अंमलदाराला सेवेतून निलंबित करण्यात आल्याची माहिती अप्पर पोलिस अधीक्षक हिंमत जाधव यांनी दिली.