पंढरपूर (सोलापूर) : शहरात आज सकाळी नव्याने सहा कोरोना पॉझिटिव्ह रुग्ण वाढले आहेत, अशी माहिती पंढरपूर तालुका वैद्यकीय अधिकारी डॉ. एकनाथ बोधले यांनी दिली. शहरातील रुग्णसंख्येत दिवसेंदिवस वाढ होत असून, शहराच्या अनेक भागात आता रुग्ण आढळू लागले आहेत. ही चिंतेची बाब आहे. 

हेही वाचा : धक्कादायक : पंढरपुरात धारदार शस्त्राने विवाहितेचा खून 

आज सकाळी प्राप्त झालेल्या अहवालानुसार, शहराच्या विविध भागातील सहा व्यक्तींचे रिपोर्ट पॉझिटिव्ह आले आहेत. जुनी पेठ येथे एक पुरुष, संत पेठेमध्ये महापूर चाळ शाळा नंबर नऊजवळ एक पुरुष, सांगोला रोडवर यमाई तुकाईजवळ एक पुरुष, इसबावी येथील बसवेश्वर नगरमध्ये दोन पुरुष तर जिजाऊ नगरमधील एका महिलेचा यामध्ये समावेश आहे. 
पूर्वी शहरामध्ये जे पॉझिटिव्ह रुग्ण आढळले होते, त्यांच्या संपर्कातील या सर्व व्यक्ती आहेत. आज नव्याने सापडलेल्या या सर्व सहा रुग्णांना वाखरी येथील एमआयटीमधील कोव्हिड केअर सेंटरमध्ये उपचारासाठी दाखल करण्यात आले आहे. 

हेही वाचा : सोलापूर जिल्ह्यात यंदा उसाचे बंपर पीक; 150 लाख मेट्रिक टन ऊस गाळपासाठी मिळणार 

पंढरपूर शहरात आजपर्यंत 47 जणांचे रिपोर्ट पॉझिटिव्ह आले होते. त्यापैकी 18 व्यक्ती बऱ्या झाल्या आहेत तर एका व्यक्तीचा मृत्यू झाला आहे. सद्य:स्थितीत पंढरपूर तालुका व जिल्हा कनेक्‍शन असलेल्या सात व्यक्ती आणि पंढरपूर शहर व तालुक्‍यातील 21 अशा एकूण 28 व्यक्तींवर उपचार सुरू आहेत. 

पूर्वी परगावाहून पंढरपूरला आलेले रुग्ण सापडले होते. परंतु गेल्या काही दिवसांपासून पंढरपूर शहरातील व्यक्तींचे रिपोर्ट पॉझिटिव्ह येऊ लागले आहेत. त्यामुळे शहरातील सर्व नागरिकांनी विनाकारण घराच्या बाहेर न पडता सर्वतोपरी काळजी घेतली पाहिजे, असे आवाहन प्रशासनाच्या वतीने करण्यात आले आहे. 

संपादन : श्रीनिवास दुध्याल