Solapur Crime - मोहोळ तालुक्यातील वेगवेगळ्या दोन घटनात दोघांचा मृत्यू झाला. पहिली घटना सोमराय नगर (मोहोळ) येथील तर दुसरी घटना पोखरापूर येथे घडली. दोन्ही घटनांची नोंद मोहोळ पोलिसात झाली आहे.

प्रकाश रामचंद्र काकडे यांची सोमराय नगर येथे शेती आहे. त्यांच्या जमीन गट नंबर 777/1(अ) मध्ये केळीची बाग आहे. रविवार ता 25 रोजी सकाळी पावणे बारा वाजता काकडे घरी असताना त्यांच्या शेतातील काम करणारा मजूर शरीफ मैनोद्दीन मरपाली वय 42 याने प्रकाश काकडे यांना फोन करून सांगितले की, केळीच्या बागेत एक अनोळखी इसम मृत अवस्थेत पडलेला आहे, त्याची दुर्गंधी सुटली आहे.

प्रकाश काकडे यांनी तातडीने बागेत जाऊन पाहिले असता, एक पुरुष जातीचा 30 ते 40 वर्ष वयाचा अनोळखी इसम मृत अवस्थेत आढळून आला. त्याने अंगात पिवळा शर्ट व निळसर रंगाची पॅन्ट, पायात निळ्या रंगाचा बूट घातलेला आहे. त्याच्या संपूर्ण शरीराला व चेहऱ्याला आळ्या लागून त्याचा मृतदेह कुजला असल्याचे दिसून आले.

सदरचा मृत इसम कोणाच्या परिचयाचा आहे का या बाबत परिसरात चौकशी केली असता त्याला कोणीही ओळखत नसल्याचे सांगितले. याबाबत प्रकाश काकडे यांनी मोहोळ पोलिसात खबर दिली असून अधिक तपास पोलीस उपनिरीक्षक लोंढे करीत आहेत.दुसरी घटना पोखरापूर ता मोहोळ येथे घडली. आकाश विठ्ठल भोसले रा पोखरापूर हे रात्री एक वाजता विहिरी वरील विद्युत पंप चालू करण्यासाठी उठले होते.

त्यावेळी त्यांनी घाबरून घरातील सर्वांना मोठ्याने आवाज दिला व घराबाहेर गेल्यास सांगितले. घरातील आई व दोन बहिणी यांनी बाहेर येऊन पाहिले असता आकाश भोसले यांची आज्जी जनाबाई संतराम भोसले वय 70 हीने दोन झाडांच्या मध्ये असलेल्या केबलला दोरीच्या साह्याने गळफास घेतल्याचे निदर्शनाला आले. या बाबत आकाश भोसले यांनी मोहोळ पोलिसात खबर दिली असून अधिक तपास पोलीस उपनिरीक्षक राजेंद्र राठोड करीत आहेत