सोलापूर : सोलापूर जिल्हा सहकारी दूध उत्पादक व प्रक्रिया संघाच्या संचालक मंडळाची निवडणूक आता स्पष्ट झाली आहे. राज्यात सत्तेवर असलेल्या राष्ट्रवादी, शिवसेना, कॉंग्रेस या महाविकास आघाडी सरकारमधील दिग्गज नेत्यांनी एकत्रित येत सोलापूर जिल्हा दूध संघासाठी महाविकास आघाडीचे पॅनल तयार केले आहे. राष्ट्रवादीचे जिल्हाध्यक्ष बळीराम साठे यांच्या सुनबाई वैशाली जितेंद्र साठे यांना महाविकासच्या पॅनलमधून उमेदवारी न मिळाल्याने त्यांनी दूध संघ बचाव कृती समितीची उमेदवारी स्वीकारली आहे.

महाविकास आघाडीच्या नेत्यांनी एकत्रित केलेल्या पॅनलला कपबशी तर दूध संघ बचाव समितीला रोडरोलरचे चिन्ह मिळाले आहे. निवडणूक लढविणाऱ्या उमेदवारांची यादी व चिन्ह वाटप आज झाले आहे. दूध संघाच्या प्रचाराला आता खऱ्या अर्थाने सुरवात होणार आहे. महिलांचा प्रतिनिधी मतदार संघातील दोन जागांसाठी मंगळवेढा तालुक्‍यातील निर्मला काकडे व बार्शी तालुक्‍यातील धामणगाव येथील छाया ढेकणे यांना महाविकास आघाडीच्या पॅनेलची उमेदवारी मिळाली आहे. त्यांच्या विरोधात दूध संघ बचाव समितीने करमाळा तालुक्‍यातील केम येथील संगीता लोंढे व उत्तर सोलापूर तालुक्‍यातील वडाळा येथील वैशाली जितेंद्र साठे यांना उमेदवारी दिली आहे. दूध संघाच्या 17 जागांपैकी 1 जागा बिनविरोध झाली आहे. 16 जागांसाठी निवडणूक लागली आहे. दूध संघ बचाव समितीने क्रियाशिल मतदार संघातील 7, महिला मतदार संघातील दोन, अनुसुचित जाती/जमाती मतदार संघात एक, भटक्‍या जाती/जमाती/विशेष मागास प्रवर्ग मतदारसंघातील 1 अशा 11 जागांवर उमेदवार दिले आहेत.

प्रमोद बोडके