सोलापुर : शनिवारी दुपारी विजेच्या कडकडाटा सह झालेल्या पावसाने अंगावर वीज पडून एका शेतकर्‍याचा मृत्यू झाला, तर दुसर्‍या ठिकाणी एका म्हशीचा मृत्यू झाला. बाळू गोविंद सरवदे वय 51रा. नजीक पिंपरी असे मृत शेतकर्‍याचा नाव आहे. यासंदर्भात मिळालेल्या माहितीनुसार, नजीक पिंपरी ता मोहोळ येथील रहिवाशी बाळू सरवदे यांची तांबोळे शिवारात शेती आहे. सध्या रब्बी हंगाम सुरू आहे.

पेरणी करण्यासाठी शेतकरी जमिनीच्या मशागतीच्या कामात गुंतला आहे याच पार्श्वभूमीवर बाळू सरवदे याचा भाऊ शेतात पेरणी करीत होता, तर बाळू हा पाठीमागे गवत वेचत होता. अचानक आकाशात जोराची वीज कडाडली व ती बाळूच्या अंगावर पडली, त्यामुळे तो गंभीर जखमी होऊन जागीच मृत झाला.

विशेष म्हणजे दोघा भावात केवळ पाच फुटाचेच अंतर होते. विज पडताच बैल सैरावैरा पळाले मृत बाळू याच्या पश्चात दोन लहान मुले, एक मुलगी, पत्नी, आई, वडील असा परिवार आहे. या घटनेची नोंद मोहोळ पोलिसात झाली आहे.

दुसरी घटना कोन्हेरी ता मोहोळ येथे घडली. दुपारी तीन वाजता मेघगर्जने सह पावसाला सुरुवात झाली जनार्दन महिपती मुळे हे शेतात राहतात. त्यांनी म्हैस घराच्या समोर बांधली होती. दुपारी अचानक जोराची वीज कडाडली व ती म्हशीवर पडली त्यामुळे म्हशीचा मृत्यू झाला. या घटनेचा अहवाल गावकामगार तलाठी व्ही.एच. चव्हाण यांनी महसूल प्रशासनाला दिला आहे. अंगावर वीज पडून जनावर दगावण्याची कोन्हेरी येथील आठवड्यातील ही दुसरी घटना आहे.