सोलापूर : महानगरपालिक, जिल्हा परिषद व पंचायत समितीच्या आगामी सार्वत्रिक निवडणुकीसाठी जिल्हा प्रशासनाने कालबध्द कार्यक्रम आखावेत, मतदार जनजागृतीसाठी ऑनलाईन वेबीनार घ्यावेत, ५ जानेवारी २०२२ पर्यंत अंतिम मतदार यादी तयार करण्याच्या सूचना राज्य निवडणूक आयुक्त यु. पी. एस. मदान यांनी आज राज्यातील जिल्हाधिकाऱ्यांना केल्या आहेत.

राज्य निवडणूक आयुक्त श्री. मदान, मुख्य निवडणूक अधिकारी श्रीकांत देशपांडे यांनी आज व्हिडीओ कॉन्फरन्सद्वारे जिल्हाधिकारी तथा जिल्हा निवडणूक अधिकारी मिलिंद शंभरकर, निवडणूकचे उपजिल्हाधिकारी भारत वाघमारे, महानगरपालिकेचे सहाय्यक आयुक्त, जिल्हा प्रशासन अधिकारी यांना महापालिका आणि स्थानिक स्वराज्य संस्थेच्या निवडणुकीबाबत मार्गदर्शन केले. १ जानेवारी २०२२ या अर्हता दिनांकावर आधारित छायाचित्रासह मतदार यादीचा विशेष संक्षिप्त पुनर्रिक्षण कार्यक्रम घोषित केला आहे. यामध्ये मतदार यादी अद्ययावत व शुध्द होण्याच्या दृष्टिने ९ ऑगस्ट ते ३१ ऑक्‍टोबर दरम्यान मतदार पडताळणी कार्यक्रम राबविण्यात आला आहे.

दुबार, समान नोंदणी, एकापेक्षा अधिक नोंदी, तांत्रिक त्रुटी दूर करणे, मतदान केंद्रस्तरीय अधिकारी यांच्याद्वारे घरोघरी भेट देवून पडताळणी करणे, मतदान केंद्राचे सुसूत्रीकरण व प्रमाणीकरण करण्याबाबत त्यांनी मार्गदर्शन केले. विशेष संक्षिप्त कार्यक्रम राबविण्याकरीता जिल्हाधिकारी व महापालिका आयुक्त यांनी समन्वयाने मतदान जागृती करणे, मतदार यादी शुद्धीकरण करण्यासाठी, मतदार नोंदणी बाबत

नागरिकांना आवाहन करावे. राजकीय पक्षांच्या स्थानिक पदाधिकारी यांच्या बैठका घेवून त्यांना आगामी निवडणुकाबाबत आवगत करणे, महाविद्यालय, म.न.पा. शिक्षण मंडळाच्या व शिक्षण मंडळ जिल्हा परिषद यांच्या अधिपत्याखाली असणाऱ्या माध्यमिक शाळेमध्ये मतदार जागृती अभियान राबविण्याच्या सूचना करण्यात आल्या आहेत.

• प्रारुप मतदार यादी प्रसिध्दी : १ नोव्हेंबर

• प्रारूप मतदार यादीवर दावे, हरकती स्विकारण्याची मुदत : ३० नोव्हेंबर

• दावे व हरकती निकाली काढण्याची मुदत : २० डिसेंबर

• अंतिम मतदार यादी करण्यास मुदत : ५ जानेवारी २०२२