मंगळवेढा : 26 ग्रामपंचायत निवडणुकीसाठी पहिल्या दोन तासात 14.4% इतके मतदान झाल्याची माहिती तहसीलदार मदन जाधव यांनी दिली. तालुक्यातील 27 ग्रामपंचायत मधील ब्रम्हपुरी ग्रामपंचायत बिनविरोध झाली. हिवरगाव या ग्रामपंचायतीमध्ये सरपंच व सहा सदस्य बिनरोध निघाले मात्र एका जागेसाठी ही निवडणूक लागली.

एकूण 26 सार्वत्रिक व एका पोट निवडणूकीसाठी मतदान प्रक्रिया राबवली जात आहे.प्रचारादरम्यान अनेक प्रकारचे आरोप प्रत्यारोप करण्यात आले .काही गावात किरकोळ वादाचे प्रसंग देखील उद्भवले. रस्त्यालगत असणारे ढाबा संस्कृती ग्रामीण भागात पोहोचल्यामुळे निवडणूक काळात हे ढाबे फुल असल्याचे दिसून आले.

तालुक्यातील शेलेवाडी, शिरशी, खडकी, जुणोनी, देगाव, अकोले, बठाण, उचेठाण, महमदाबाद हुन्नर, रेवावाडी, चिक्कलगी, भाळवणी, जंगलगी, डीकसळ, मुंढेवाडी, खुपसंगी, निंबोणी, लोणार, लमाणतांडा, मानेवाडी, लक्ष्मी दहिवडी, रड्डे, नंदूर, आंधळगाव, पडोळकरवाडी, जालिहाळ, हिवरगाव या गावातील एकूण 70 उमेदवार सरपंच पदासाठी तर एकूण 517 उमेदवार सदस्य पदासाठी आपले नशीब आजमावत आहेत.

या निवडणुकीसाठी 94 केंद्रावरती मतदान होणार सकाळी 7.30 वाजता मतदानात सुरुवात झाली पहिल्या दोन तासात 52 हजार 809 मतदारांपैकी 3738 पुरुष व 3677 स्त्रिया असे एकूण 7415 मतदारांनी मतदानाचा हक्क बजावला. सर्वात कमी मतदान भाळवणी ग्रामपंचायतीच्या प्रभाग दोन मध्ये 6.63% झाले तर सर्वात जास्त मतदान देगाव ग्रामपंचायतीसाठी प्रभाग तीन मध्ये 29.22% इतके मतदान असून त्यासाठी 115 मतदान पथके तैनात करण्यात आली.

या पथकांमध्ये मतदान केंद्राध्यक्ष, मतदान अधिकारी, पोलीस कर्मचारी, शिपाई तसेच राखीव पथकातील कर्मचारी असे एकूण 690 कर्मचाऱ्यांचा समावेश आहे. प्रत्यक्ष मतदानासाठी एकूण 94 कंट्रोल युनिट व 135 बैलेट युनिट वापरण्यात येणारी आहेत. निवडणूक प्रक्रियेसाठी पुरेसे मनुष्यबळ उपलब्ध करून देण्यात आले असून 23 निवडणूक निर्णय अधिकारी, 23 सहायक निवडणूक निर्णय अधिकारी यांची नेमणूक करण्यात आली.