सोलापूर - पाचशे रुपये द्यायला नकार दिल्यानंतर संशयितांनी आंब्याची पेटी मागितली, पण तेही द्यायला नकार दिल्याने नऊ जणांनी मिळून अरबाज अल्ताफ बागवान (रा. न्यू बापुजी नगर, शास्त्री नगर) या तरुण व्यापाऱ्याच्या डोक्यात हत्याराने वार केला. तसेच लोखंडी रॉड व लाथाबुक्क्यांनी देखील मारहाण केली. या प्रकरणी नऊ जणांविरुद्ध सदर बझार पोलिसांत खुनाचा प्रयत्न केल्याचा गुन्हा दाखल झाला आहे.

दरम्यान, बुधवारी (ता. २४) रात्री साडेदहाच्या सुमारास अरबाज बागवान हे भारत नगरातील कचरा डेपोजवळील गोडावूनमध्ये पिकअपमधील आंबा उतरवत होते. त्यावेळी रोहित परदेशी हा त्याच्या सहकाऱ्यांसोबत तेथे आला. ‘क्या अरबाज आज बहोत अच्छा आम आया है’ असे म्हणून रोहितने पाचशे रुपये मागितले. त्यावेळी सध्या आंबा छाटणीचे काम सुरु असून तू नंतर ये, असा अरबाज म्हणाला.

तेव्हा संशयित आरोपी रोहितने एक कॅरेट आंब्याची मागणी केली. त्यालाही नकार दिल्याने काहीवेळाने रोहित परदेशी, चेतन परदेशी, अभिषेक परदेशी, गण्या लिंबू, आरिफ शेख व त्याचे इतर चार साथीदार त्याठिकाणी आले. त्यांनी आंब्याची नासधूस केली. त्यावेळी घाबरलेला अरबाज व त्याचे वडील गोडावूनमध्ये कडी लावून लपून बसले. संशयित गोडावूनला दगड मारत असल्याने ते बाहेर आले. त्यावेळी रोहितने आरबाजच्या डोक्यात वार केला.

अरबाजला चक्कर आली आणि तो खाली बसला. त्यावेळी गण्या तलवार आण म्हणत अरबाज व त्याच्या वडिलांना जीवे मारण्याची धमकी दिली. अभिषेकने दगड तर गण्याने फरशीचा तुकडा अरबाजच्या डोक्यात घातला. आरिफ शेख व इतर साथीदारांनी लोखंडी रॉडने मारहाण केली. चेतनने अरबाजच्या वडिलांना मारहाण केली. अरबाजकडील मोबाईल संशयितांनी रोडवर आपटून फोडला. गोडावूनमधील लाईटचेही नुकसान केल्याचे फिर्यादीत नमूद आहे.