सलगर बुद्रूक (सोलापूर) : मागील वर्षी म्हणजेच 2019 मध्ये जून-जुलै महिन्यात खरिपाचा हवामान आधारित फळपीक विमा शेतकऱ्यांनी भरला होता. पण ज्या शेतकऱ्यांनी सोलापूर जिल्हा मध्यवर्ती बॅंकेच्या खात्यावर विमा रक्कम जमा व्हावी म्हणून फॉर्म भरला होता, त्या शेतकऱ्यांच्या विम्याचे पैसे अजूनही खात्यावर जमा झाले नव्हते. त्यामुळे जिल्ह्यातील शेतकरी विम्यापासून वंचित होते. दरम्यान, या वृत्ताची दखल "सकाळ'ने आपल्या डिजिटल व 28 जुलैच्या अंकात प्रसिद्ध केल्यानंतर प्रशासन खडबडून जागे झाले व तीन दिवसांत शेतकऱ्यांच्या खात्यामध्ये विम्याची रक्कम जमा करण्यात आली. यामुळे सर्व शेतकऱ्यांमधून "सकाळ'चे कौतुक होत आहे. 

हेही वाचा : तो आला, त्यानं पाहिलं अन्‌ तिघांना आपलंसं केलं..! "या' ग्रामपंचायत पदाधिकाऱ्यांना कोरोनाची लागण 

इतर बॅंकांमध्ये विमा जमा 
दरम्यान, सोलापूर जिल्हा मध्यवर्ती बॅंक सोडून इतर राष्ट्रीयकृत बॅंकांमध्ये ज्या शेतकऱ्यांनी विमा भरला होता, त्या शेतकऱ्यांच्या विम्याचे पैसे मार्च-एप्रिलमध्येच जमा झाले होते. पण सोलापूर जिल्हा मध्यवर्ती बॅंकेमध्ये विमा भरलेल्या शेतकऱ्यांवर आंदोलन करण्याची वेळ आली होती. मात्र आता विम्याची रक्कम जमा झाल्याने शेतकरी आनंदात आहेत. 

हेही वाचा : संघर्षातून मिळवले यश : परिस्थितीवर मात करणाऱ्या सोनालीला डॉक्‍टर बनण्याच्या स्वप्नासाठी हवा मदतीचा हात ! 

आता आंबे बहाराची प्रतीक्षा 
खरिपाबरोबरच शेतकरी आंबे बहाराचाही फळपीक विमा दरवर्षी भरत असतात. मागील वर्षी खराब हवामानामुळे मंगळवेढ्यासह संपूर्ण जिल्ह्यामध्ये आंबे बहारामध्ये बहार धरलेल्या बागांचे देखील खूप मोठे नुकसान झाले होते. त्यामुळे तोही फळपीक विमा मंजूर होऊन मिळावा, अशी मागणी शेतकरी वर्गातून होत आहे. 

सलगर बुद्रूकचे विमाधारक शेतकरी पांडुरंग कांबळे म्हणाले, मी व माझ्या गावातील शेतकऱ्यांनी जून 2019 मध्ये हवामान आधारित फळपीक विमा भरला होता. विमा मंजूर होऊनही आमच्या खात्यावर विमा रक्कम जमा होत नसल्यामुळे "सकाळ'ने आमच्या प्रश्नाची दखल घ्यावी अशी मागणी आम्ही "सकाळ'कडे केली होती. आमच्या मागणीला "सकाळ'ने साथ दिली व संबंधित विषयावर बातमी प्रसिद्ध होताच तीन दिवसांमध्ये आमच्या खात्यावर विमा रक्कम जमा झाली आहे. त्यामुळे आम्ही "सकाळ'चे अभिनंदन करत आहोत. 

संपादन : श्रीनिवास दुध्याल