सोलापूर : राज्यातील शाळांमध्ये आता दिवसातून तीन वेळा "वॉटर बेल' वाजणार आहे. या संदर्भातील आदेश शालेय शिक्षण व क्रीडा विभागाने आज (मंगळवारी) जारी केले. वेळ निश्‍चित करण्याची जबाबदारी मुख्याध्यापकांवर टाकण्यात आली आहे. 

दिवसांतून तीन वेळा वाजणार वाॅटर बेल
विद्यार्थ्यांनी भरपूर पाणी प्यावे, त्यांचे आरोग्य चांगले राहावे, यासाठी महाराष्ट्र राज्यातील सर्व शाळांमध्ये "वॉटर बेल' हा उपक्रम राबविण्याचे आदेश  दिले. शाळेच्या वेळेत तीनदा "वॉटर बेल' वाजवावी. त्याची वेळ संबंधित शाळेच्या मुख्याध्यापकांनी निश्‍चित करावी, असे आदेशात म्हटले आहे. अभ्यास आणि खेळण्याच्या नादात मुले पाणी पिण्याचे विसरून जातात. त्यामुळे शाळेच्या वेळापत्रकात तीन वेळेला "वॉटर बेल' वाजवावी आणि मुलांना पाणी पिण्यास सांगावे. परिणामी त्यांची पाणी पिण्याबाबत मानसिकता तयार होईल व पुढे सवय होईल. तसेच या वेळेत मुलांना स्वच्छतागृह वापरण्याची मुभाही उपलब्ध करून द्यावी, असे या संदर्भातील आदेशात म्हटले आहे. 

हेही वाचा - खानदेशवासियांनी सोलापूर महापालिकेत नोकरीची संधी 

आरोग्यावर परिणामाची शक्यता 
प्रौढासह शालेय विद्यार्थ्यांना दिवसभरात एक ते तीन लिटर पाणी पिणे आवश्‍यक असते. परंतु, कामाच्या गडबडीत पाणी पिण्याकडे दुर्लक्ष होते. शाळेत मध्यांतरात डबा खाल्यानंतर विद्यार्थी पुरेसे पाणी पितीलच असे नाही. शाळेत पाच ते सहा तास असताना ते एखाद वेळेसच पाणी पितात. त्याचा परिणाम आरोग्यावर होण्याची शक्‍यता असते. पाण्याचे प्रमाण उंची, वय आणि वजनानुसार बदलते. पाण्याने भरलेली बाटली मुले तशीच घरी आणतात. पाणी कमी प्यायल्यामुळे मुलांच्या शरीरामध्ये पाण्याचे प्रमाण कमी होणे, थकवा येणे, मुत्रमार्गात संसर्ग होणे, किडनी स्टोन होणे, चिडचिडेपणा वाढणे हे प्रकार होतात. 

हेही वाचा - घरभेद्यांमुळे उत्पन्नावर परिणाम 

प्रातिनिधीक उपक्रम झाला बंधनकारक
दिवसातून अनेक वेळा पाणी पिण्याची सवय लहानपणापासूनच लागावी, यासाठी केरळ, कर्नाटक, तेलंगणा येथील शाळांमध्ये "वॉटर बेल' हा उपक्रम राबविला जातो. शाळेच्या वेळेत खास पाणी पिण्यासाठी दोन वेळा बेल वाजवली जाते. त्या वेळी सर्व विद्यार्थी, शिक्षक पाणी पितात. हा उपक्रम उपयुक्त असल्यामुळे काही शाळांनी स्वत:हून "वॉटर बेल'चा उपक्रम सुरू केला. सोलापूर शहर व जिल्ह्यातील काही शाळांमध्येही प्रातिनिधीक स्तरावर हा उपक्रम राबविला गेला.