सोलापूर : कोरोनाचा संसर्ग रोखण्यासाठी आता सोलापूर शहर पोलिस प्रशासन सरसावले आहे. शहरात गर्दी होऊ नये यासाठी यापूर्वीच लागू करण्यात आलेल्या जमावबंदी आदेशाचे काटेकोर व कठोरपणे पालन करण्यास आजपासून सुरवात झाली आहे. सोलापुरातील प्रमुख चौक, चहाची दुकाने, बाजारपेठा येथे गर्दी करणाऱ्या नागरिकांना मोबाईल व्हॅनद्वारे सूचना देऊन गर्दी कमी केली जात आहे. 
हेही वाचा - सोलापूरला गुडन्यूज : प्रयोगशाळेला मिळणार पन्नास लाखांची यंत्रसामग्री 
सोलापूरचे जिल्हाधिकारी मिलिंद शंभरकर यांनी 14 मार्च रोजी सोलापूर शहर व जिल्ह्यात आपत्ती व्यवस्थापन अधिनियम, महाराष्ट्र पोलिस अधिनियम आणि भारतीय साथ रोग नियंत्रण अधिनियम लागू केला आहे. आयपीसी कलम 144 नूसार जमावबंदी आदेशही लागू करण्यात आला आहे. आज सकाळपासून सोलापूर शहरातील जमावबंदीच्या आदेशाची काटेकोरपणे अंमलबजावणी केली जात आहे. पोलिसांनी मास्क वापरावे अशी सूचना पोलिस आयुक्त अंकुश शिंदे यांनी केली आहे. सोलापूर शहरातील लग्न सोहळे आज साध्या पद्धतीने व मोजक्‍या वऱ्हाडी मंडळीच्या उपस्थितीत पार पडले आहेत.