माढा (सोलापूर): माढा शहरातील कोरोनाची साखळी तोडण्यासाठी आजपासून सोमवारपर्यंत ( ता. 10 ) जनता कर्फ्यू पुकारण्यात आल्याची माहिती नगराध्यक्षा ऍड. मीनल साठे यांनी दिली. मंगळवारी (ता. 4) जनता कर्फ्यूला नागरिक व व्यापाऱ्यांनी भरभरून प्रतिसाद दिल्याचे दिसून आले. 

हेही वाचाः एमपीएससी दोनदा उत्तीर्ण, मात्र तिसऱ्या प्रयत्नात बार्शीचे अजिंक्‍य विद्यागर आयएएस 

माढयात कोरोना रुग्णांची संख्या वाढत आहे. शहरात सोमवारी (ता. 3) नवीन सात रुग्ण्‌ सापडले. शहरातील शुक्रवार पेठ, भांगे गल्ली, शिवाजीनगर, संतसेनानगर यासारख्या भागात रूग्ण आढळून आले आहेत. मात्र मागील दोन - तीन दिवसांत शहरात रुग्णसंख्या वाढत असताना मंगळवारी (ता. 4) मात्र शहरात एकही नवीन रुग्ण आढळला नाही. शहरातील कोरोनाची साखळी तोडण्यासाठी सात दिवसांचा जनता कर्फ्यू लागू केला आहे. यासंदर्भात काल सोमवारी (ता. 3) सायंकाळी बैठक घेण्यात आली होती. या बैठकीस माढा नगरपंचायतीचे मुख्याधिकारी चरण कोल्हे, दादासाहेब साठे, माढा पोलीस स्टेशनचे सहाय्यक पोलीस निरीक्षक अमुल कादबाने, गुरुराज कानडे यांच्यासह पदाधिकारी व अधिकारी यांची मते जाणून घेऊन जनता कर्फ्यूचा निर्णय घेण्यात आला. 

हेही वाचाः अधिकाऱ्यांच्या गावात अजुन एक अधिकारी ! उपळाई बुद्रुकच्या आश्‍विनी वाकडे यांचे यश 

जनता कर्फ्यूच्या कालावधीत दवाखाने, मेडिकल दुकाने यासारख्या वैद्यकीय सेवा नेहमीप्रमाणे सुरू राहणार आहेत. सकाळ्‌ सात ते नऊ व रात्री सात ते नऊ दुग्ध व्यवसाय सुरू राहणार आहे. सकाळी नऊ ते दुपारी बारा या वेळेत पिण्याचे पाणी पुरविण्यात येणार आहे. तरी सर्व नागरिकांनी शासन, नगरपंचयात, आरोग्य विभाग यांनी दिलेल्या सुचनांचे वेळोवेळी पालन करावे. आपल्या कुटुंबासह माढा शहराच्या सुरक्षेसाठी या जनता कर्फ्यूचे पालन करावे व सुरक्षित रहावे असे आवाहन ऍड. साठे यांनी केले. 

संपादन ः प्रकाश सनपूरकर