मंगळवेढा(सोलापूर)ः जिल्ह्यात कोरोनाची वाढती आकडेवारी पाहता शहरात नगरपरिषदेकडून साथरोगाचे सर्व्हे करण्याचे काम युद्धपातळीवर सुरू आहे. यात ताप, सर्दी, खोकला, घसा खवखवणे, श्‍वसनास त्रास, धाप लागणे, शुगर, रक्‍तातील ऑक्‍सिजनचे प्रमाण आदी आजारांची तपासणी केली जात असल्याची माहिती मुख्याधिकारी पल्लवी पाटील यांनी दिली. 

हेही वाचाः गुड न्युजः अक्कलकोट झाले कोरोनामुक्त 

एक महिन्यापूर्वी थर्मल स्क्रनिंगद्वारे शरीरातील तापमान तपासणी केली. बाहेर गावावरून येणाऱ्या लोकांचे प्रमाण वाढले आहे. त्यामुळे पुन्हा एकदा संपूर्ण शहरातून थर्मल स्क्रनिंग, ग्लुकोमीटरद्वारे शुगर व ऑक्‍सिमीटरद्वारे रक्‍तातील ऑक्‍सिजनचे प्रमाण तपासणीेचे काम युद्धपातळीवर सुरू केले. रेड झोनमधून आलेल्या नागरिकांना क्वारंटाइन करणे व शहरातील नागरिकांच्या आरोग्याची तपासणी करण्यावर भर देण्यात येत आहे. 

हेही वाचाः तर पालकमंत्र्यांना जिल्ह्यात पाय ठेवू देणार नाही 

शहरात नगरपालिक कर्मचारी, शिक्षण मंडळाच्या शिक्षिका तसेच अंगणवाडी सेविकांच्या मदतीने सर्वेक्षण सुरू आहे. थर्मल स्क्रिनिंगद्वारे शरीराचे तापमान तपासणी करून जादा तापमानाची नोंद झालेल्यांना ग्रामीण रुग्णालयाकडे पाठविण्यात येते. तर पथकाने ऑक्‍सिमीटरद्वारे रक्‍तातील ऑक्‍सिजनचे प्रमाण तपासण्याचे काम चालवले आहे. ज्या 50 ते 55 वर्षे वयोगटातील नागरिकांना मधुमेहाचा त्रास आहे. ज्यांना हॉस्पिटलमध्ये जाऊन शुगर तपासणी शक्‍य नाही अशा नागरिकांची प्रत्यक्ष जागेवर तपासणी करून त्यांच्या आरोग्याची काळजी घेत असल्याचे मुख्याधिकारी पाटील यांनी सांगितले. 

नागरिकांनी स्वतःची काळजी घ्यावी 
शासनाने काही प्रमाणात निर्बंध घालून उद्योग, व्यापार व व्यवसाय सुरू करण्यास परवानगी दिली. नागरिकांनीच आत दैनंदिन जीवनात सुरक्षित अंतर ठेवणे, मास्क वापरणे, सतत हात धुणे या सवयी स्वतःला लावून घ्याव्यात. इतर ठिकाणांवरून आलेल्या नागरिकांची माहिती द्यावी व शहराचा नावलौकिक कायम ठेवावा. काही अडचण असल्यास नगरपालिकेशी संपर्क साधावा. 
-अरुणा माळी, नगराध्यक्षा