पंढरपूर (सोलापूर) : दुधाला प्रतिलिटर 30 रुपये दर मिळावा, दूध पावडला 50 रुपये अनुदान द्यावे यासह इतर प्रमुख मागण्यांसाठी आज (मंगळवारी) स्वाभिमानी शेतकरी संघटनेच्या वतीने दूध आंदोलन पुकारण्यात आले. स्वाभिमानी शेतकरी संघटनेचे जिल्हाध्यक्ष तानाजी बागल आणि उपाध्यक्ष धनंजय पाटील यांच्या उपस्थितीत गादेगाव येथे ग्रामदैवत हनुमानाला दुधाचा अभिषेक करून आंदोनाला सुरवात करण्यात आली. 

हेही वाचा : ब्रेकिंग ! "हे' मंत्री म्हणाले...सोलापुरात पुन्हा कडक लॉकडाउन होणार नाहीच 

आज तालुक्‍यातील उपरी, खेडभोसे, आंबे, चळे आदींसह तालुक्‍यातील अनेक गावांमध्ये स्वाभिमानीच्या कार्यकर्त्यांनी आंदोलन केले. स्वाभिमानीच्या आंदोलनामुळे आज तालुक्‍यातील सुमारे चार लाखांहून अधिक लिटर दुधाचे संकलन बंद आहे. कोरोनामुळे दूध व्यवसाय संकटात आला आहे. त्यातच दुधाला दर मिळत नसल्याने दूध उत्पादक अधिकच आर्थिक अडचणीत आले आहेत. दुधाला 30 रुपये प्रतिलिटर दर मिळावा, अशी मागणी स्वाभिमानीचे माजी खासदार राजू शेट्टी यांनी केली होती. त्यानंतरही राज्य शासनाने कोणतीच दखल घेतली नाही. सरकारचे दूध दराकडे लक्ष वेधून घेण्यासाठी स्वाभिमानीने आज आंदोलनाची हाक दिली होती. त्यानुसार पंढरपूर तालुक्‍यात दूध आंदोलन करण्यात आले. 

हेही वाचा : गाफीलपणा नको, कोरोनाचा संसर्ग होण्यापूर्वी तुम्ही पोहोचा, मुख्यमंत्री ठाकरे यांच्या सोलापूर प्रशासनाला सूचना 

गादेगाव येथे आज सकाळी ग्रामदैवत हनुमानाला दुधाचा अभिषेक करून आंदोलनाला सुरवात झाली. या वेळी स्वाभिमानीच्या कार्यकर्त्यांनी दूध दरवाढ मिळावी यासह राज्य सरकारच्या विरोधात घोषणाबाजी केली. उपरी येथेही आज ग्रामदैवत हनुमानाला दुधाचा अभिषेक घालून आंदोलन करण्यात आले. खेडभाळणी येथील शेतकऱ्यांनी रस्त्यावर दूध ओतून सरकारचा निषेध केला. 

संपादन : श्रीनिवास दुध्याल