सोलापूर : विधानसभेतील अनेक आमदारांना पद्धतशीरपणे हाताळणारे माजी विधानसभा अध्यक्ष दिलीप वळसे-पाटील यांची राज्याच्या राजकारणात शिस्तीचे हेडमास्तर म्हणून ओळख आहे. सलग सातव्यांदा आमदार झालेले वळसे-पाटील यांच्याकडे सोलापूर जिल्ह्याच्या पालकमंत्रीपदाची धुरा आली आहे. राजकारणात आणि समाजकारणात संवेदनशील व अग्रभागी असलेल्या सोलापूर जिल्ह्यात सध्या वळसे-पाटील यांच्या एन्ट्रीची चर्चा सुरू आहे. सोलापूर जिल्ह्याच्या राजकारणात आणि प्रशासनात सध्या पालकमंत्री दिलीप वळसे-पाटील यांच्या कार्यपद्धतीची कुजबूज सुरू आहे. 
हेही वाचा - मुझे एकदिन ओ कमरेमे ले गये और... 
शिस्तीचे आणि अभ्यासू मंत्री सोलापूरचे पालकमंत्री झाल्याने प्रशासनातील अधिकारी अलर्ट झाले आहे. प्रशासनाच्या बैठकांना कार्यकर्त्यांनी फिरकू नये असा नियमच पालकमंत्री वळसे-पाटील यांनी केल्याने राजकारणी धास्तावले आहेत. जिल्ह्याच्या राजकारणात आणि प्रशासनात सध्या पालकमंत्री वळसे-पाटील यांची कार्यपद्धती चर्चेचा विषय होऊ लागली आहे. राष्ट्रवादीचे पक्षाध्यक्ष शरद पवार यांचे विश्‍वासू सहकारी म्हणून वळसे-पाटील यांची राज्याच्या राजकारणात ओळख आहे. तब्बल सातव्यांदा विधानसभेत आंबेगावचे प्रतिनिधित्व करणाऱ्या वळसे-पाटील यांनी विधानसभा अध्यक्षासह विविध खात्याचे मंत्री म्हणून काम केल्याने समोरच्याचा अंदाज आणि अभ्यास त्यांना क्षणात येत असल्याची प्रचिती अधिकाऱ्यांना येऊ लागली आहे. 
हेही वाचा - म्हशीच्या गोठ्याला बंगल्याचे रूप! 
विचारलेल्या प्रश्‍नांना सोडून तिसरीच माहिती देणाऱ्या अधिकाऱ्यांना आजच्या आढावा बैठकीत शिस्त आणि मुद्दा याचा अनुभव आला आहे. वेळेवर उपस्थितीत आणि अपडेट माहिती याची तयारी आता अधिकारी व कर्मचारी करू लागले आहेत. पालकमंत्र्यांच्या प्रशासकीय बैठकीला त्या पक्षाचे कार्यकर्ते आणि नेते हमखास हजर राहून मी किती जवळचा आहे हे दाखविण्याचा प्रयत्न करतात. तसा प्रयत्न मात्र पालकमंत्री वळसे-पाटील यांच्या बैठकांच्या बाबतीत होताना दिसत नाही. प्रशासकीय बैठकीला राष्ट्रवादीचे पदाधिकारी व कार्यकर्ते येत नसल्याने कार्यकर्त्यांनाही यातून नवीन शिकायला मिळू लागले आहे. 
पुढच्या दौऱ्यात पक्षीय बैठका 
पालकमंत्री म्हणून नियुक्ती झाल्यानंतर सोलापूरच्या दुसऱ्या दौऱ्यात वळसे-पाटील यांनी जिल्ह्याच्या प्रशासनाची आज तब्बल पाच तास बैठक घेतली. सोलापूरच्या विकासासोबतच आपण पक्ष संघटनेलाही महत्त्व देणार असल्याचे वळसे-पाटील यांनी यापूर्वीच जाहीर केले आहे. त्यामुळे त्यांच्या आगामी दौऱ्यात पक्ष संघटनेच्या बैठका व सुधारणा यावर भर दिला जाण्याची शक्‍यता असून तसे संकेतही त्यांनी आजच्या दौऱ्यात दिले आहेत.