सोलापूर : कोरोनामुळे आगामी शैक्षणिक वर्ष लांबणीवर पडणार हे निश्‍चित झाले असून 2020-21 च्या शैक्षणिक वर्षाचे नियोजन आतापासूनच सुरु झाले आहे. पहिले सेमिस्टर होईपर्यंत प्राध्यापकांनी ऑनलाइन टिचिंगची तयारी ठेवावी अन्‌ विद्यापीठांनी तशाप्रकारे सुविधा उपलब्ध करावी, असे राज्यपाल नियुक्‍त समितीने आपल्या अहवालात नमूद केले आहे. तर अभ्यासक्रम पूर्ण करण्यासाठी विद्यार्थ्यांच्या दिवाळी सुट्ट्याही कमी केल्या जाणार आहेत. 

हेही नक्‍की वाचा : रेल्वेचा निर्णय ! ऑनलाइन बुकिंग केलेल्या प्रवाशांना 100 टक्‍के परतावा 

विद्यार्थ्यांच्या परीक्षेचे नियोजन करण्यासाठी राज्यपाल भगतसिंह कोश्‍यारी यांनी पुणे, मुंबई, कोल्हापूर आणि एसएनडीटी विद्यापीठांच्या कुलगुरुंची समिती नियुक्‍ती केली. तर परीक्षा कशाप्रकारे घ्यायची, यासाठी विद्यापीठ अनुदान आयोगाने स्वतंत्र समिती नियुक्‍त केली आहे. तरीही राज्यातील 13 अकृषिक विद्यापीठांमधील 50 लाख विद्यार्थ्यांच्या परीक्षेचा निर्णय अद्यापही झालेला नसून सरकार याबाबत लवकरच निर्णय घेईल. तत्पूर्वी, आगामी शैक्षणिक वर्ष महिन्याहून अधिक काळ लांबणीवर पडणार नाही, याची दक्षताही शिक्षण विभागाकडून घेतली जात आहे. सोशल डिस्टन्सिंगमुळे प्राध्यापकांना साधारणपणे ऑगस्ट-सप्टेंबरपर्यंत ऑनलाइन टिचिंग करावे लागणार आहे. त्यादृष्टीने सोलापूर, पुण्यासह अन्य विद्यापीठांमध्ये नियोजन सुरु झाले आहे. पहिल्या सेमिस्टरचा अभ्यासक्रम पूर्ण व्हावा, यासाठी विद्यार्थ्यांच्या 25 दिवसांच्या दिवाळी सुट्ट्या कमी करुन पाच ते आठ दिवसच दिल्या जाणार आहेत. 

हेही नक्‍की वाचा : सकाळ ब्रेकिंग ! दहावीच्या भूगोल पेपरचा ठरला निर्णय 

ऑनलाइन प्रवेशासाठी महाविद्यालयांचे विद्यापीठांकडे बोट 

राज्यातील विद्यापीठांच्या शैक्षणिक वर्षाची सुरवात 15 जूनऐवजी आता जुलैपासून होईल, असे गृहीत धरुन विद्यापीठांनी तयारी सुरु केली आहे. कोरोनामुळे सोशल डिस्टन्सिंगचे पालन करावे लागणार असल्याने आगामी शैक्षणिक वर्षातील संपूर्ण महाविद्यालयीन विद्यार्थ्यांची प्रवेश प्रक्रिया ऑनलाइन पध्दतीने करावी लागणार आहे. त्यासाठी महाविद्यालयांनी सहकार्य करावे, अशी अपेक्षा सोलापूर विद्यापीठाचे परीक्षा नियंत्रक डॉ. श्रेणिक शहा यांनी व्यक्‍त केली. मात्र, राज्यातील साडेपाच हजार महाविद्यालयांपैकी 30 टक्‍के महाविद्यालयांनी नकार देत विद्यापीठांकडे बोट दाखविले आहे. त्यामुळे शैक्षणिक वर्ष सुरु होण्यापूर्वीच प्रवेश प्रक्रियेचा नवा पेच निर्माण झाला आहे. 

हेही नक्‍की वाचा : गृह मंत्रालयाचा निर्णय ! जप्त वाहनांबद्दल पोलिस आयुक्‍त म्हणाले... 

ऑनलाइन टिचिंगची तयारी ठेवावी लागेल 
राज्यातील 50 लाख महाविद्यालयीन विद्यार्थ्यांच्या परीक्षेबाबत चार ऍक्‍शन प्लॅन तयार केले असून राज्यपाल नियुक्‍त समिती दोन दिवसांत उच्च शिक्षण विभागाला अहवाल सादर करेल. राज्यातील सद्यस्थिती पाहता आगामी सेमिस्टर होईपर्यंत प्राध्यापकांना ऑनलाइन टिचिंगची तयारी ठेवावी लागेल. 
- डॉ. नितीन करमळकर, सावित्रीबाई फुले विद्यापीठ, पुणे