सोलापूरः शहरातील उद्योग व व्यापाऱ्यांना दुकाने उघडण्याची परवानगी मिळाल्यानंतर मधला मारुती व कुंभार वेस परिसरात मोठ्या दुकानांसोबत रस्त्यावर बसून माल विकणाऱ्या विक्रेत्यांनी माल मांडून त्याची विक्री सुरू केली. त्यासोबत अनेक दिवसांपासून खरेदी बंद असल्याने ग्राहकांनी देखील बाजारात मोठीच गर्दी केली होती. शहरातील विविध भागांत दुकाने व व्यवसाय सुरू करण्याची परवानगी मिळाली. 

हेही वाचाः कुटुंबाला सावरत जगण्याची लढाई शकुंतला शटगुंडे यांचे शिलाई मशिनवर काम 

सकाळपासूनच दुकानदारांनी सफाई सुरू केली होती. स्वच्छतेनंतर अनेक दुकानांत निर्जंतुकीकरणाची औषधी फवारणी करण्यात आली. तसेच ग्राहकांसाठी सॅनिटायझर ठेवण्यात आले होते. मोठ्या दुकानांसोबत शिलाई कारागीर, भांड्यावर नाव टाकून देणारे कारागिर, लोखंडाचे भाते चालवणारे कामगार, फुलवाले, नारळवाले, सुया, मणी व पोत विकणाऱ्या महिला अशा कितीतरी लहान विक्रेते व कारगिरांची बाजारात गर्दी झालेली होती. 

हेही वाचाः आजारी जावयाचा रिपोर्ट आला निगेटिव्ह 

दुकानासमोर वाहने लावून मालाची चढ-उतार केली जात होती. दुकानदार फोनवरून मालाच्या बुकिंगच्या कामाला लागले होते. दुकानात सकाळपासून माल लावण्याची कामे सुरू होती. दुकानाबाहेर ग्राहकांची गर्दी होती. दुकानमालकांनी पहिला दिवस असल्याने स्वतः दारात उभे राहून सॅनिटायझर ग्राहकाच्या हातावर दिले. अंडी विक्रेते, चप्पल दुरुस्ती, गाड्या दुरुस्ती कारागीर यासह कितीतरी प्रकारचे कारागिर बाजारात आल्याने गर्दी मोठ्या प्रमाणात वाढली होती. 
शहरातील रस्त्यांवर वाहनांची गर्दी व पादचाऱ्यांची वर्दळ यामुळे परिसर फुलून गेला होता. कापड, किराणा, चप्पल व बूट विक्री, होलसेल किराणा, शोभिवंत वस्तूंची दुकाने, रेडिमेड, जनरल स्टोअर्स आदी अनेक प्रकारची दुकाने उघडली गेली होती. 
दुकानात काही व्यापाऱ्यांनी तीन फुटांचे सोशल डिस्टन्सिंग ठेवण्यासाठी काउंटरसमोर दोरी बांधून सोय केली होती. जागरूक व्यापाऱ्यांनी या नियमाचे तंतोतंत पालन केले. तरीही बाजारपेठ सुरू झाल्यानंतर कोरोनाचा संसर्ग वाढेल किंवा कमी होईल याबाबत उलटसुलट चर्चा सुरू होती. बाजारात अगदी बोटावर मोजण्याइतक्‍या काही ऍटो उभ्या होत्या. ऍटोमध्ये प्रवासी जादा संख्येने घेणे कोरोना संसर्गामुळे शक्‍य नाही म्हणून रस्त्यावर अगदी तुरळक ऍटो धावत होत्या.