मोहोळ (सोलापूर): आज्जीला मिळालेल्या जमिनीवरती वारसा हक्काने एकुलत्या एक मुलाची वारस नोंद असताना त्याच्या चुलत भावाने माजी सरपंच, गावकामगार तलाठी, मंडल अधिकारी, ग्रामसेवक, सरपंच, पोलिस पाटील, व कोतवाल यांना हाताशी धरून मयताचे बोगस कागदपत्रे दाखले, खोट्या सह्या, बनावट कागदपत्रे तयार करून त्या जमिनीवर सात जणांची बोगस नोंद लावल्याची घटना उघडकीस आली. या प्रकरणी मंडल अधिकारी, तलाठी, ग्रामसेवक व सरपंचासह 13 जणावर मोहोळ पोलिस ठाण्यात फसवणुकीचा गुन्हा दाखल करण्यात आला. ही घटना तालुक्यातील ढोक बाभळगाव येथे घडली.

या बाबत मोहोळ पोलिसांनी दिलेल्या माहिती नुसार, देविदास मनोहर बेलेराव यांची आजी अफ्रुका लक्ष्मण बेलेराव हिला शासनाकडून गायरान जमीन मिळाली होती. अफ्रुका बेलेराव यांच्या मृत्यूनंतर सदर जमिनीवरती अफ्रुका यांचा नातु देविदास मनोहर बेलेराव यांचे नाव लागले होते. असे असताना देविदास बेलेराव यांचे चुलत भाऊ विकास बेलेराव यानी 1 जुलै 2021 रोजी त्या जमिनीवर आम्हा भावांची नावे लावावीत म्हणून तलाठयाकडे अर्ज केला होता. त्या अर्जानुसार ढोकबाभुळगाव च्या तलाठ्याने बोगस नोटीसा काढल्या तसेच फिर्यादी ची आज्जी अफ्रुका ही सोलापूर येथे मयत झाली असताना ती ढोकबाभुळगाव येथे मयत झाल्याचा खोटा दाखला ग्रामसेवकाकडून घेतला.

याबरोबरच ढोकबाभुळगावचे सरपंच, पोलिस पाटील, कोतवाल या सर्वांना हाताशी धरून खोट्या सह्या व बोगस दाखले घेवून त्या जमीनीवर फिर्यादी एकटा वारस असताना इतर सात जणांची नावे वारसदार म्हणून नोंद केल्याचे उघडकीस आले आहे. याप्रकरणी देविदास बेलेराव यांनी दिलेल्या फिर्यादीनुसार ढोक बाभुळगावचा कामती विभागाचा मंडल अधिकारी सुनिल केरबा बेलभंडारे, तलाठी सिद्धेश्वर हरीविजय नकाते, ग्रामसेवक मिलिंद कृष्णाजी तांबीले, महिला सरपंच रुक्मिणी राजाराम पांढरे, कोतवाल राजेद्र जालिधंर कुंभार, यांच्या सह माजी सरपंच बंडू शंकर मुळे, विकास गंगाराम बेलेराव, तानाजी दशरथ बेलेराव, सरूबाई शिवाजी बेलेराव, रुक्मिणी सतीश माने, जनाबाई गगाराम बेलेराव, जनार्धन गंगाराम बेलेराव, संगीता शिवाजी सुरवसे या तेरा जणांच्या विरोधात फसवणुकीचा गुन्हा दाखल करण्यात आला असून या घटनेचा तपास सहाय्यक पोलिस निरीक्षक सुधीर खारगे हे करीत आहेत.