सोलापूर : स्वामित्व योजनेअंतर्गत गावठाणांचे भूमापन करून मिळकत पत्रिका देण्याच्या राज्य शासनाच्या उपक्रमाला सुरवात झाली आहे. या योजनेअंतर्गत दक्षिण सोलापूर तालुक्‍यातील दहा गावांची निवड करण्यात आल्याची माहिती भूमी अभिलेख उपअधीक्षक किरण कांगणे यांनी दिली. 

हेही वाचा : "या' जिल्ह्यात वाढली "अँटिजेन'मुळे रुग्णसंख्या! मात्र मृत्यूदर आला दहावरून 5.5 टक्‍क्‍यांवर 

श्री. कांगणे म्हणाले, ड्रोनद्वारे सर्व गावांच्या मिळकतींची मोजणी मार्च ते मे या कालावधीत करण्यात येणार होती. मात्र, कोरोनाच्या संसर्गामुळे ती करता आली नाही. राज्य शासनाने सध्या एक हजार गावांतील गावठाणांची ड्रोनद्वारे मोजणी करून दोन ऑक्‍टोबरपर्यंत मिळकत पत्रिका देण्याचे निश्‍चित केले आहे. यासाठी दक्षिण सोलापूर तालुक्‍यातील शिरवळ, इंगळगी, आलेगाव, बोरूळ, कणबस, बंकलगी, तिल्हेहाळ, हिपळे, सिंदखेड, आचेगाव या गावांची निवड केली आहे. गावठाण भूमापन योजना अत्यंत महत्त्वपूर्ण आणि उपयुक्त योजना आहे. योजना यशस्वी होण्यासाठी आपल्या मिळकतीचे सीमांकन वेळेवर करून घ्यावे व ग्रामविकास अधिकारी / भूमी अभिलेख अधिकारी व कर्मचाऱ्यांना सहकार्य करावे, असे आवाहन श्री. कांगणे यांनी केले आहे. 

हेही वाचा : राज्यातील साखर कारखान्यांपुढे शॉर्ट मार्जिनचे संकट; साखर विक्रीची किंमत वाढवून द्यावी 

स्वामित्व योजनेची वैशिष्ट्ये व फायदे 

• गावठाणातील प्रत्येक घराचा नकाशा तयार होणार 
• धारकांना मिळकतीचे सीमा व नेमके क्षेत्र कळणार 
• गावठाणातील धारकांना मालमत्तेचे अधिकार मिळणार 
• विविध आवास योजनेअंतर्गत मंजूरी करणे सुकर होईल 
• मालमत्तेचे मालकी हक्क संबंधी अभिलेख व नकाशे तयार झाल्याने आर्थिक पत उंचावेल 
• गावठाणातील जागेचे मालकी व हद्दीसंबंधी वाद/तंटे संपुष्टात येतील 
• गावठाणातील जमिनीचे खरेदी-विक्री व्यवहारामध्ये होणारी फसवणूक टळेल 
• गावठाणातील सार्वजनिक जागा, बखळ जागा, रस्ते, नाले यांचे नकाशे व अभिलेख तयार होणार असल्याने सार्वजनिक मालमत्ताचे होणार संरक्षण 

संपादन : श्रीनिवास दुध्याल