पंढरपूर (सोलापूर) : सोलापूर जिल्ह्यात व पंढरपूर शहरात देखील कोरोना पॉझिटिव्ह रुग्णांची संख्या वाढत आहे. राज्य शासनाने राज्यातील सर्व धार्मिक स्थळे 31 जुलैपर्यंत बंद ठेवण्याचा निर्णय घेतला आहे. हे लक्षात घेऊन श्री विठ्ठल - रुक्‍मिणी मंदिर देखील 31 जुलैपर्यंत बंद ठेवण्याचा निर्णय श्री विठ्ठल - रुक्‍मिणी मंदिर समितीने घेतला आहे, अशी माहिती समितीचे सहअध्यक्ष गहिनीनाथ महाराज औसेकर आणि कार्यकारी अधिकारी विठ्ठल तथा सुनील जोशी यांनी दिली. 

हेही वाचा : पंढरपूर शहर-ग्रामीणमध्ये आज आढळले 20 कोरोना पॉझिटिव्ह रुग्ण 

कोरोना विषाणूचा संसर्ग भाविकांना होऊ नये यासाठी दक्षता म्हणून 17 मार्चपासून श्री विठ्ठल - रुक्‍मिणी मंदिर भाविकांना दर्शनासाठी बंद करण्यात आलेले आहे. कोरानाबाधित रुग्णांची संख्या वाढत आहे, हे लक्षात घेऊन आता 31 जुलैपर्यंत श्री विठ्ठल - रुक्‍मिणी मंदिर भाविकांसाठी बंद ठेवण्यात येणार आहे. श्री विठ्ठल मंदिर भाविकांसाठी बंद असले तरी पहाटे होणारी "श्रीं'ची काकडा आरती, नित्यपूजा, महानैवेद्य, पोशाख, धुपारती व शेजारती इथंपर्यंतचे सर्व उपचार पूजा परंपरेनुसार करण्यात येत आहेत. सणवार, उत्सव परंपरेनुसार मात्र साध्या पद्धतीने साजरे करण्याचा निर्णय श्री विठ्ठल - रुक्‍मिणी मंदिर समितीने घेतला आहे, अशी माहिती समितीचे सहअध्यक्ष गहिनीनाथ महाराज औसेकर आणि कार्यकारी अधिकारी विठ्ठल तथा सुनील जोशी यांनी दिली. 

संपादन : श्रीनिवास दुध्याल