सोलापूरः अभियंता दिनाच्या निमित्ताने घेण्यात आलेल्या निबंध स्पर्धेत बळीराजा एक पीक शिफारस आणि जोखीम चेतावनी प्रणाली या निबंधासाठी वालचंद अभियांत्रिकी महाविद्यालयास विजेतेपद मिळाले. 

हेही वाचाः दुचाकीस्वाराने पळवला बोलत चालणाऱ्याचा मोबाईल, पार्किंगमधील रिक्षा घेऊन चोरटा पसार 

येथील इन्स्टिट्युट ऑफ इंजिनिअर्स (आयईआय) च्या वतीने अभियंता दिनाचे आयोजन करण्यात आले होते. आयईआयच्या सोलापूर सेंटरच्या वतीने निबंध स्पर्धा घेण्यात आली. या स्पर्धेला राज्यभरातून मोठा प्रतिसाद मिळाला. यामध्ये प्रथम वालंचद अभियांत्रिकी महाविद्यालयाच्या विद्यार्थ्यांनी सादर केलेल्या बळीराजा एक पीक शिफारस आणि जोखीम चेतावणी प्रणाली या निबंधाला दहा हजाररुपयाचे पहिले बक्षिस जाहीर करण्यात आले. तसेच थर्मल इमेजिंग वापरुन स्तन कर्करोगाचे लवकर निदान या विषयावर बंगळुरूच्या सह्याद्री अभियांत्रिकी महाविद्यालयाला द्वितीय तर ग्रामीण भारताच्या विकासासाठी सेल्प सर्विंहग ग्रीड कनेक्‍ट सौर सिंचन प्रणाली या विषयावर संत गजानन महाराज अभियांत्रिकी महाविद्यालय कोल्हापूर यांना तृतीय बक्षिस जाहीर करण्यात आले. 

हेही वाचाः हिप्परगा तलाव सुशोभिकरणासाठी लोकसहभागावर भर 

यावेळी प्रमुख पाहुणे म्हणून गोवाचे तंत्रशिक्षण संचालक डॉ. व्ही.बी. कामत, शासकीय तंत्रनिकेतनचे प्राचार्य डॉ.एम.आर. चितलांगे, आयईआयचे सोलापुर सेंटरचे अध्यक्ष डॉ.एस.एस. पाटील, सचिव पी.के.मगदुम, माजी अध्यक्ष डॉ. जी.के. देशमुख, संचालक डॉ. एन.एस. काटीकर हे उपस्थित होते. 
यावेळी डॉ. चितलांगे यांनी सांगितले की, डॉ. विश्‍वेशरय्या यांचा आदर्श डोळ्यासमोर ठेवून काम करावे. नवतंत्रज्ञानाबरोबरच औद्योगीक विकासामध्ये प्रगती करणे काळाची गरज असून नाविन्याचा वेध घ्यावा. पर्यावरण पुरक व शाश्‍वत विकासाकडे वाटचाल करण्यासाठी अभियंत्यांनी प्रयत्नशील राहीले पाहिजे असे नमुद केले. गोवा राज्याचे तंत्रशिक्षण संचालक डॉ. कामत यांनी सांगितले की, अभियंता हे संशोधनाचे स्त्रोत असुन आपल्या कल्पक व नाविन्यपुर्ण विचारामुळे नवनवीन संशोधन अभियंत्याकडुन होत असते. त्यामुळे कृषी, जलसंधारण व शिक्षण क्षेत्रात भरीव कामगिरी करुन समाजामध्ये सुक्ष्मसिंचन, पाणी बचत अशा संकल्पना राबवण्यासाठी प्रयत्न व्हावेत असे सांगितले. कार्यक्रमाचे सुत्रसंचालन डॉ. एन.एस.काटीकर यांनी केले तर पी.के.मगदुम यांनी आभार मानले. कार्यक्रमासाठी संयोजक एन.एस. काटीकर, अध्यक्ष डॉ. एस.एस.पाटील, सचिव पी.के.मगदुम, एस.बी ठिगळे, एम.जी.कल्याणशेट्टी, एस.जी.शिरसीकर, एस.एम.मुकणे, पी.डी.भैरगुंडे आदींनी पुढाकार घेतला.