पंढरपूर (सोलापूर) : कौठाळी (ता.पंढरपूर) येथील ढाणे परिवाराने मुलीच्या जन्माचा आगळ वेगळा कौतुक सोहळा साजरा केला. लक्ष्मीच्या पावलांनी घरी आलेल्या मुलीचे ढोल ताशाच्या गजरात स्वागत करुन उपस्थित महिलांना विविध वृक्षांची रोपे भेट दिली. तसेच 'बेटी बचाव, बेटी पढाव' असा सामाजिक संदेश ही दिला.

हे ही वाचा : व्यायामसाठी सायकल पुन्हा ट्रेंडमध्ये ; ग्रामीण भागातही वाढला वापर

कौठाळी (ता.पंढरपूर) येथील शेतकरी संग्राम व सिमा ढाणे या दाम्पत्याला पहिलीच मुलगी झाली. पहिली बेटी, धनाची पेटी असे समजून ढाणे परिवाराने मुलीच्या जन्माचे ढोल ताशाच्या गजरात स्वागत केले. ढाणे कुटुंबिय शेतकरी असले तरी संग्राम हे उच्चशिक्षीत आहेत. त्यांनी आपल्या घरी लक्ष्मीच्या पावलांनी आलेल्या मुलीच्या जन्माचे असे आगळे वेगळे स्वागत करुन मुलीविषयी समाजात जनजागृती केली.

आजही समाजात मुलगी झाली की नाकं मुरडणारे आई वडील आपण पहातो. मुलगी नको म्हणून तिची गर्भातच हत्या करणारे अनेक महाभाग समाजात वावरताना दिसतात. मुलगी ही दोन्ही घरी दिवा लावते. मुलगा आणि मुलगी असा कोणताही भेदभाव न करता तिला आपल्या मुलासारखे वागवणारे आणि तिचे पालन पोषण करणारेही आई वडील आहेत.

हे ही वाचा : रासायनिक खताच्या बेसुमार वापरामुळे जमिनीचे प्रदूषण

यापैकीच एक असलेल्या संग्राम व सिमा ढाणे यांनी आपल्या मुलीच्या जन्माचे जंगी स्वागत करुन मुलीबद्दलचे प्रेम अधिकच वृध्दींगत केले आहे. दोन दिवसापूर्वी ढाणे परिवाराने मुलाच्या स्वागतासाठी विविध रंगीबेरंगी फुलांच्या पायघड्या घालून तीचे स्वागत केले.  गावातून ढोलताशाच्या गजरात मिरवणूकही काढली. घरच्या मंडळींनी त्या चिमुकल्या मुलीच्या पायांचे ठसे उमवट गृह प्रवेश दिला.

फुग्यांची आणि विविध फुलांची घरात साजवट केली होती. आलेल्या मित्र मंडळी आणि महिलांना मिष्ठान्न् दिले. त्याचबरोबरच मुलीच्या जन्माची आठवण म्हणून प्रत्येकाला एक रोप ही भेट दिले. संग्राम ढाणे यांनी आपल्या मुलीच्या जन्माच्या निमित्ताने  पर्यावरण संतुलन आणि वृक्ष संवर्धनाचा सामाजिक संदेशही दिला आहे. त्यांच्या आगळ्यावेगळ्या सामाजिक उपक्रमाचे परिसरात कौतुक  केले जात आहे.

संपादन - सुस्मिता वडतिले