सोलापूर : एसटीची (ST Bus) 17 टक्के तिकीट दरवाढ, रेल्वेला (Railway) वेटिंग त्यातच ट्रॅव्हल्स (Travels) चालकांनी एसटी बंदची संधी साधत तिकीटदरात केलेली भरमसाठ वाढ यामुळे सामान्य प्रवाशांची पिळवणूक होत आहे. आरटीओचे (RTO) भरारी पथक कुठेही दिसून येत नाही. त्यामुळे ट्रॅव्हल्सची दिवाळी झाली अन्‌ प्रवाशांचे दिवाळे निघाल्याची सद्य:स्थिती आहे.

एसटी कर्मचाऱ्यांनी पुकारलेल्या संपामुळे सोलापूर विभागातील नऊ आगारांतून एकही एसटी बस सुटली नाही. हीच संधी साधत ट्रॅव्हल्स चालकांनी केलेली मनमानी भाडेवाढ तब्बल तीनपट होती. जादा तिकीट दर घेणाऱ्यांवर नजर ठेवण्यासाठी आरटीओकडून दोन भरारी पथकांची नियुक्‍ती करण्यात आली आहे. प्रवाशांकडून अव्वाच्या सव्वा भाडे घेतले जात असल्याच्या तक्रारी प्रवासी करत आहेत. मात्र याकडे लक्ष न देता आरटीओची भरारी पथके गायब असल्याचे पुन्हा एकदा सिद्ध झाले. एसटी कर्मचाऱ्यांच्या बंदमुळे खासगी वाहनांनी आपले गाव गाठण्यासाठी प्रवासी धडपडत होते. मात्र खासगी वाहने तिप्पट तिकीट दर आकारत असल्याने अनेकांनी बसस्थानकातच बसणे पसंत केले.

मोटार वाहन कायद्याप्रमाणे एसटी तिकिटाच्या 15 टक्के ट्रॅव्हल्सचे दर असावेत. मात्र प्रत्यक्षात त्याहून जास्त तिकीटदर आकारले जात असून, प्रवाशांची मोठ्या प्रमाणावर आर्थिक लूट होत आहे. प्रवासी संख्येपेक्षा अधिक प्रवासी घेऊन ट्रॅव्हल्स पुणे, मुंबई, नाशिक आदी मार्गांवर धावत असल्याचे 'सकाळ'च्या पाहणीत दिसून आले. आरटीओने अशा ट्रॅव्हल्सवर थेट कारवाई करणे गरजेचे आहे.

दररोज 80 खासगी ट्रॅव्हल्स वाहने

सोलापूर शहरातून दररोज सुमारे 80 ट्रॅव्हल्स वाहनांनी प्रवासी वाहतूक होते. यातून जवळपास चार ते पाच हजार प्रवासी प्रवास करतात. सर्वाधिक गाड्या पुण्यासाठी धावतात. त्यानंतर मुंबई, नागपूर, नाशिक या शहरांच्या मार्गावर देखील गाड्या धावतात.

जादा तिकीटदर आकारलेल्या ट्रॅव्हल्स चालकांवर कारवाई करण्यात येणार आहे. यासाठी दोन पथकांची नियुक्‍ती करण्यात आली आहे. तक्रार येताच अशा खासगी ट्रॅव्हल्स चालकांवर कारवाई केली जाईल.

- विजय तिराणकर, सहाय्यक उपप्रादेशिक परिवहन अधिकारी, सोलापूर