सांगली : सांगली जिल्ह्याचे सुपुत्र, साहित्यरत्न, लोकशाहीर अण्णा भाऊ साठे यांच्या जन्मशताब्दी वर्षात सांगलीत भव्य पुतळा उभारण्यासाठीचा मार्ग मोकळा झाला आहे. कर्मवीर चौकातील जागेवर पुतळा उभारण्यास बांधकाम विभागाने मंजुरी दिली आहे. महापालिकेच्या माध्यमातून पुतळा परिसर विकसित केला जात आहे.

घोडावत फाउंडेशन परिसर विकासासाठी 50 लाखांचा निधी देणार आहे. आता लवकरच पुतळा उभारणीसंदर्भात आणि सांगलीतील स्मारकासंदर्भात बैठक होऊन निर्णय घेतला जाईल. जन्मशताब्दी समितीचे अध्यक्ष आकाश तिवडे, सचिव कुलदीप देवकुळे यांनी ही माहिती दिली. 

ते म्हणाले, 'लोकशाहीर अण्णा भाऊ साठे यांची शंभरावी जयंती उत्साहात आणि व्यापक स्वरूपात साजरी करण्याचे नियोजन केले होते. परंतु, गेल्या वर्षी कोरोनाच्या संकटामुळे शंभरावी जयंती साधेपणाने साजरी केली. अण्णा भाऊंच्या जन्मशताब्दी वर्षात त्यांचा सांगलीत पुतळा उभारला जावा, यासाठी सर्व पक्षांतील राजकीय नेते, पदाधिकारी प्रयत्नशील होते. परंतु, कोरोनाच्या संकटामुळे काही काळ लांबला. परंतु, आता पुतळा उभारणीसाठीचा मार्ग मोकळा झाला आहे. कर्मवीर चौकातील जागेवर पुतळा उभारण्यास बांधकाम विभागाने मंजुरी दिली आहे. महापालिका प्रशासनातर्फे नियोजित पुतळा परिसर विकसित केला जात आहे. मुरूमीकरण, वीज, पाणी आदी व्यवस्था केली आहे.

हेही वाचा - ब्रेकिंग ; सांगलीत हाय प्रोफाइल वेश्या व्यवसाय अड्डा छाप्यात पोलिस निरीक्षकालाच बेड्या -

घोडावत फाउंडेशन 50 लाखांचा निधी देणार आहे. यंदा ऑगस्टमध्ये जन्मशताब्दी वर्षाची सांगता होईल. तत्पूर्वी, कर्मवीर चौकात पुतळा उभारण्यासंदर्भात पालकमंत्री जयंत पाटील, जिल्हा प्रशासन, राजकीय पक्षांचे पदाधिकारी आणि समिती यांची संयुक्त बैठक होईल. या बैठकीत पुतळा आणि स्मारक उभारणीसंदर्भात निर्णय घेतला जाईल.' नगरसेवक अभिजित भोसले, नगरसेवक जगन्नाथ ठोकळे, असिफ बावा, सॅमसन तिवडे, मार्तंड लोंढे, बंडू केंगार, उत्तम मोहिते आदी या वेळी उपस्थित होते.