सांगली : राज्य शासनाने जाहीर केलेल्या अंशतः टाळेबंदीच्या निर्णयाविरोधात व्यापाऱ्यांमध्ये संतापाची भावना आहे. शासनाने सुधारित आदेश काढावा अन्यथा तीव्र आंदोलन केले जाईल असा इशारा व्यापारी नेत्यांनी दिला आहे. पाडवा आणि लग्नसराईच्या प्रारंभालाच शासनाने ऐंशी टक्के बाजारपेठेला टाळे लावले आहे. त्यातून महापालिका क्षेत्रातील व्यापारच रसातळाला जातील अशी भिती व्यक्त होत आहे. 

मंत्रीमंडळाने घेतलेल्या निर्णयाच सुक्ष्म तपशिल अद्याप जिल्हा प्रशासनाकडून जाहीर झालेले नाहीत. पालकमंत्र्यांच्या उपस्थितीत दुपारी साडे तीनला बैठक आहे त्यानंतरच तपशिल स्पष्ट होतील. व्यापारी नेत्यांनी गेले आठवडाभर आम्हाला विश्‍वासात घ्या अशी सातत्याने मागणी केली आहे मात्र आयुक्त-जिल्हाधिकाऱ्यांकडून अद्याप कोणत्याही स्वरुपात याबाबत संपर्क झाला नसल्याचे व्यापारी नेते समीर शहा यांनी "सकाळ' ला सांगितले. 

हेही वाचा- पॅकेजमधील फुलाची पाकळी तरी मिळेल आता याचीच प्रतीक्षा;पंतप्रधान नरेंद्र मोदींवर जयंत पाटीलांनी साधला निशाणा

ते म्हणाले, शहरातील स्थानिक स्थिती विचारात घेऊन प्रशासनाने मंत्री मंडळाच्या निर्णयाची अंमलबजावणी केली पाहिजे. जीवनावश्‍यक दुकाने सोडून म्हणजे नेमकी कोणती दुकाने सुरु राहणार याबाबत तपशिल स्पष्ट नाही. रेस्टॉरंट बंद आणि वडापावचा गाडा सुरु या धोरणात सुरक्षित अंतर कोठे पाळले जाते हे शासनाने आधी स्पष्ट करावे. शहरात टाळेबंदी लागू होईल त्याचवेळी ग्रामिण भागात शिथिलता असेल.

हेही वाचा- जोतिबाची चैत्री यात्रा रद्द; करवीर निवासिनी अंबाबाई मंदिरासह सर्व मंदिरे 30 एप्रिलपर्यंत दर्शनासाठी बंद

महिनाभर दुकाने बंद राहिली तर संपुर्ण व्यापारच तिकडे जाईल. गेली दोन वर्षे व्यापारी घायकुतीला आहे. यापुढे अशी स्थिती राहिली तर व्यापाऱ्यांना जगणेच अवघड होईल. रेटून टाळेबंदी लागू केल्यास आम्ही दोन दिवसात कठोर आंदोलनासाठी तयार आहोत. गुढी पाडवा, लग्नसराईचे दिवस आहेत अशा काळात व्यापार बंद ठेवला तर पुढील वर्षच वाया गेल्यासारखे आहे. ऐंशी टक्के व्यापार बंद राहणार आहे हेच अद्याप दुकानदारांना माहित नाही. ते पुर्ण समजेल तेव्हा उद्रेक झालेला असेल.''

संपादन- अर्चना बनगे