संगमनेर (नगर ) ः तालुक्‍याच्या पठार भागातील नांदूर खंदरमाळच्या भागवत मळा, बावपठार भागातील काही शेतकऱ्यांच्या विहिरींना तडे जाऊन, पाणी आटल्याने पठार भागातील ग्रामस्थांमध्ये भीतीचे वातावरण निर्माण झाले आहे. 

याबाबत अधिक माहिती अशी ः नांदूर खंदरमाळ गावातील भागवत मळा, बावपठार येथील राधू सखाराम भागवत यांच्या घराजवळील 50 फूट खोल विहिरीतील पाणी मंगळवारी रात्रीपर्यंत होते. मात्र, बुधवारी सकाळी पाणी तळाला गेले असून, काही ठिकाणी तडे गेल्याचे निदर्शनास आले.

या घटनेची चर्चा गावात होताच, गोपीनाथ भागवत, आप्पा भागवत, नाना भागवत याही शेतकऱ्यांच्या विहिरीचे पाणी तळाला गेल्याचे समजले. या परिसरात भूकंपाच्या भीतीने घबराट निर्माण झाली आहे. संगमनेर तालुक्‍यातील पठार भाग हा "डेक्कन ट्रॅप' या भूकंपप्रवण भागावर असल्याने, या परिसरातील घारगाव, बोटा, केळेवाडी, आंबी खालसा या ठिकाणी दोन-तीन वर्षांपासून भुकंपसदृश हालचाली जाणवत असल्याच्या पार्श्‍वभूमीवर, या घटनेची जोरदार चर्चा पठारात रंगली होती. 

हेही वाचा ः त्याला वीस वर्षे सक्तमजूरी

याबाबत माहिती समजल्यानंतर तहसीलदार अमोल निकम यांनी संगमनेरच्या महसूल विभागातील काही कर्मचाऱ्यांना आज दुपारी प्रत्यक्ष घटनास्थळी पाठवून अधिक माहिती घेतली. याबाबत पठारातील ग्रामस्थांनी घाबरून न जाण्याचे आवाहन करीत त्यांनी, जिल्हाधिकारी कार्यालयाकडे पत्रव्यवहार करून याविषयी अधिक संशोधन करण्यासाठी भूगर्भ शास्त्रज्ञांना पाचारण करण्याची मागणी केली आहे. 

हेही वाचा ःलव्ह मॅरेज ते सायबर क्राईम

अशा घटनांमागे भूगर्भीय हालचाली 

या घटनेबाबत नाशिकच्या "मेरी' संस्थेतील वरिष्ठ भूवैज्ञानिक चारुलता चौधरी यांच्याशी संपर्क केला असता, कोणत्याही प्रकारे भूकंपाच्या धक्‍क्‍याची नोंद "मेरी'त झाली नसल्याचे स्पष्ट करीत, अशा घटनांमागे भूगर्भीय हालचाली असल्याने, भूगर्भ शास्त्रज्ञांशी संपर्क साधण्यास सांगितले आहे. 
- अमोल निकम, तहसीलदार, संगमनेर