निपाणी - आरोग्यसंपदा चांगली राखण्यासाठी "प्रिव्हेंशन इज बेटर दॅन क्‍युअर' असे म्हटले जाते. औषध-उपचारासाठी येणारा खर्च आता आवाक्‍यात राहिला नाही. घरातला माणूस आजारी पडला की घरादाराची परवड होते. जीव वाचविण्यासाठी दागिने, जमीनजुमला गहाण ठेवावा लागतो. त्यामुळे आजारच होऊ नये, अशी काळजी घेतली, तरच जीवघेण्या रोगांपासून बचाव करता येईल, अशी अवस्था आहे. यासाठी अनेक संस्था, संघटना गरिबांना याची झळ लागू नये, यासाठी धडपडताना दिसतात. निपाणीजवळच्या म्हसोबा हिटणी (ता. हुक्केरी) येथील काही तरुणांनी गावांत सुरू केलेली "हेल्पिंग हॅंड' ही शंभर रुपये मदतीसाठी संकल्पना तशीच अनोखी व उल्लेखनीय आहे. 

हे पण वाचा -  धक्कादायक; गाळ्याला बाहेरून कुलूप; आत चालायचे अश्‍लील चाळे

तणावाखाली असणाऱ्यांना येणारा हार्ट ऍटॅक, ब्रेन हॅमरेज, मृत्यू किंवा कायमचे अपंगत्व आणणारा, सर्वांना सुन्न करणाऱ्या घटना अनेकदा घडतात. घर-दार विकून उपचार करायचे किंवा आहे त्या स्थितीत रुग्ण सांभाळायचा, अशी विचित्र अवस्था कुटुंबीयांची होते. या परिस्थितीत म्हसोबा हिटणीचे पण नोकरीनिमित्त पुण्या-मुंबईत राहणारे तरुण व्हॉटस्‌अपच्या माध्यमातून एकत्र आले आणि त्यांनी वैद्यकीय उपचारासाठी "हेल्पिंग हॅंड' व्यासपीठ उभे केले. त्यांनी 50-55 जणांचा व्हॉटस्‌ऍप ग्रुप तयार केला. ग्रुपमधील प्रत्येकाने प्रत्येकी शंभर रुपये पेटीएमद्वारे "हेल्पिंग हॅंड' खात्यावर जमा करण्यास सुरुवात केली. ही एकत्रित रक्कम नंतर रुग्णांच्या उपचारासाठी दिली. त्यातून रुग्णांच्या तपासण्या, काहींवर मोठ्या रुग्णालयात उपचार सुरु झाले. रुग्णांच्या आजाराचे रेकॉर्डही तयार केले जाणार आहे. 

हे पण वाचा - ब्रेकिंग : कडकनाथ घोटाळ्याचा पहिला बळी; तरूण शेतकऱ्याची आत्महत्या 

"हेल्पिंग हॅंड'ने यापूर्वी रक्तदान, आरोग्य तपासणीची सार्वजनिक शिबिरे, व्याख्याने घेतली आहेत. हा उपक्रम अधिक चांगल्या पद्धतीने राबविण्याचा करण्याचा स्वयंसेवकांचा प्रयत्न आहे. पूर्वी शिबिरापुरती होणारी तपासणी आता विशेषतः ज्येष्ठ नागरिक, स्त्रिया यांची दरमहा होणार आहे.

26 जानेवारीपासून मिळणार लाभ 
या नव्या उपक्रमामुळे नागरिकांचा गंभीर आजार होण्यापासून बचाव होण्यास मदत होणार आहे. या उपक्रमाची सुरवात 26 जानेवारीपासून करण्याचे निश्‍चित केले आहे. 
- प्रवीण पाटील, स्वयंसेवक, हेल्पिंग हॅंड