सोलापूर : फास्टॅग नसलेल्या वाहनांनी पथकर नाक्‍यावरील फास्टॅग लेनवर प्रवेश केल्यास त्या वाहनधारकांकडून दुप्पट पथकर आकारला जाणार आहे. उद्यापासून (मंगळवार, ता. 14) या निर्णयाची अंमलबजावणी होणार आहे. रोख रकमेव्दारे पथकर स्वीकारण्यासाठी टोलनाक्‍यावर एकच लेन उपलब्ध करून देण्यात येणार आहे. रोखीने पथकर देणाऱ्या वाहनधारकांकडून दुप्पट पथकर आकारणी केली जाणार असल्याची माहिती अशी माहिती राष्ट्रीय महामार्ग प्राधिकरणाचे प्रकल्प संचालक संजय कदम यांनी दिली. 
हेही वाचा - सोलापूर झेडपी : उद्या एक वाजता सुनावणी, दोन वाजता सभापती निवडी 
भारतीय राष्ट्रीय महामार्ग प्राधिकरणाव्दारे देशभरातील सर्व टोल नाक्‍यावर इलेक्‍ट्रॉनिक्‍स प्रणालीव्दारे पथकर स्वीकारण्यास सुरवात केली आहे. यासाठी गाडीवर फास्टॅग लावणे बंधनकारक आहे यासाठी 15 डिसेंबर 2019 पर्यंत मुदत देण्यात आली होती. मात्र ती वाढवून 14 जानेवारी 2020 पर्यंत करण्यात आली. रोखीने पथकर स्वीकारण्यासाठी पथकर नाक्‍यावर एकच लेन ठेवण्यात येणार आहे. फास्टॅग मिळविण्यासाठी आवश्‍यक असलेली कागदपत्रे याप्रमाणे - वाहनाचे रजिस्ट्रेशन सर्टिफिकेट, वाहनधारकाचे पासपोर्ट आकाराचे फोटो, केवायसीसाठी लागणारे कागदपत्रे (ड्रायव्हिंग लायसन्स, पॅनकार्ड, मतदान ओळखपत्र, आधार कार्ड आणि पासपोर्ट).