पिंपरी : पिंपरी-चिंचवड शहरातील कोरोना बाधितांची संख्या दिवसेंदिवस वाढतच आहेत. आज (शुक्रवार) सलग दुसऱ्या दिवशी चाळीसपेक्षा अधिक रुग्ण आढळले. त्यांच्यावर महापालिकेच्या वायसीएम व भोसरी रुग्णालयांत उपचार केले जात आहेत. आज 44 नवीन रूग्ण आढळले तर, 37 रुग्ण बरे होऊन घरी गेले आहेत. 

ताज्या बातम्यांसाठी डाऊनलोड करा ई-सकाळचे ऍप     

वायसीएम व भोसरी रुग्णालयातून आज 37 जणांना डिस्चार्ज देण्यात आला. ते किवळे, पिंपळे सौदागर, वाकड, चिंचवड आनंदनगर, बौद्धनगर, भोसरी, पिंपरी, निगडी, काळेवाडी फाटा, येरवडा, देहूरोड, सोलापूर, जून्नर, खडकी, आंबेगाव येथील रहिवासी आहेत. त्यांना चौदा दिवस घरातच राहण्याची सूचना वायसीएम प्रशासनाने केली आहे. 

पिंपरी चिंचवडच्या बातम्या वाचण्यासाठी येथे ► क्लिक करा

गुरुवारी सायंकाळपासून शुक्रवारी सायंकाळी सात वाजेपर्यंत 44 जणांना संसर्ग झाल्याचे आढळून आले. त्यात 23 पुरूष व 21 महिलांचा समावेश आहे. त्यामुळे शहरातील एकूण पॉझिटीव्ह रुग्णांची संख्या 678 झाली आहे. त्यापैकी 416 जण बरे होऊन घरी गेले आहेत. तर, 250 जणांवर उपचार सुरू आहेत. आजपर्यंत 12 जणांचा मृत्यू झाला आहे. 

आज पॉझिटिव्ह आलेले रुग्ण हे आनंदनगर चिंचवड, पिंपळे गुरव, दापोडी, वाकड, पिंपरी, कासारवाडी, अजंठानगर, चऱ्होली, भोसरी, काळेवाडी, रुपीनगर, राजगुरुनगर येथील रहिवासी आहेत. आज दोन जणांचा उपचारादरम्यान मृत्यू झाला. त्यात दापोडीतील 80 वर्षीय आणि राजगुरुनगर येथील 58 वर्षीय पुरुषांचा समावेश आहे. 

पुण्याच्या बातम्या वाचण्यासाठी येथे ► क्लिक करा 

पावसाळा सुरू झालेला असल्याने नागरिकांनी अत्यावश्‍यक कारणाशिवाय घरा बाहेर पडू नये. पावसामुळे मास्क ओला होणार नाही, याची काळजी घ्यावी. तसेच सोबत किमान एक अतिरिक्त मास्क ठेवावा, असे आवाहन अतिरिक्त वैद्यकीय अधिकारी डॉ. पवन साळवे यांनी केले आहे.